DILI, 6 agostu 2019 (TATOLI)—Vise Prezidente Bankada FRETILIN, Francisco Miranda Branco, husu atu konta istória loloos, labele dezvia fali líder balun.
Nia dehan, iha ámbitu selebrasaun Tinan 20 Konsulta Populár, iha tinan 43 ba kotuk, FRETILIN lori povu nia naran mak Proklama Unilaterál Independénsia RDTL nian.
“Ohin loron ita rona istória ema konta barak, maibé istória sira ne’e atu dezvia hosi lialoos. Haluha tiha balun hodi promove figura balun de’it. Ida ne’e labele. Istória ne’e tenke tau loloos nia dalan. Sira ne’ebé ita la gosta tenke tau iha laran hotu,” nia dehan ba mídia nasionál sira iha sala Bankada FRETILIN, iha Parlamentu Nasionál, tersa ne’e.
Vise Prezidente Bankada FRETILIN ne’e afirma ema ida labele konta istória ba aan rasik de’it. “Ami sente katak ida ne’e ita dezvia lialoos istória nian, tanba istória loloos sei konta hosi istoriadór sira, la’ós ita mak mak konta ita-nia istória rasik,” dehan Branco.
Nia argumenta, istória povu rai ida ne’e nia perkursu rezisténsia nasionál ne’ebé kontribui ona tenke konta loloos no tau iha fatin loloos.
Iha parte seluk, Deputadu Bankada Partidu Libertasaun Populár (PLP), Cornélio Gama ‘L7’, hateten prosesu hakerek istória ne’e tenke hahú duni, tanba lutadór balun sei moris hela.
“Hosi rejiaun I maka Lere, Aluc, Renan no Maunana. Rejiaun II maka Sabica, Maubuti, Lú Olo no Bilou Mali. Rejiaun III maka ha’u, Samba (mate ona) no Reak Leman. Rejiaun KV maka Tatamailau,” L7 haktuir.
Jornalista: Evaristo Soares Martins
Editór: Xisto Freitas
