DILI, 8 agostu 2019 (TATOLI)—Ministériu Edukasaun Juventude no Desportu (SEJD) hamutuk ho Ministra Finansa (MF) en-ezersísiu no Ministru Administrasaun Estatal (MAE) en-ezersísiu, hala’o soru-mutu ho Primeitu-Ministru (PM), Taur Matan Ruak, hodi konfirma prioridade alokasaun orsamentu jerál Estadu (OJE) 2020 nian.
“Ohin ami enkontru ho Primeiru-Ministru hodi konfirma kona-ba alokasaun orsamentu iha 2020 nian, iha área prioridade sira ne’ebé presiza investe,” tenik Ministra Edukasaun Juventude no Desportu, Dulce de Jesus Soares ba jornalista sira hafoin ramata reuniaun ho Primeiru-Ministru iha Palásiu Governu, kinta ne’e.
Iha área edukasaun, nia esplika, área prioridade sira ne’ebé presiza investe maka’as mak infraestrutura, jestaun eskolár, formasaun ba mestre sira no mós inkluzaun.
“Prioridade hirak ne’e, Ministériu Edukasaun mantein nafatin. Ohin iha diskusaun ne’e di’ak tebes. Ami hein katak sei implementa prioridade hirak ne’e iha tinan 2020,” Dulce haktuir.
Tuir kustu rekorente ne’ebé durante ne’e MEJD iha hamutuk rihun ualu-nulu ($80.000). Maibé, dadaun ne’e, MEJD sei presiza tan orsamentu balun hodi reforsa tan área edukasaun maibé seidauk iha finalidade tanba foin iha faze diskusaun entre Ministériu Estatal tanba durante ne’e parte balun hosi ministériu refere hamutuk ho MEJD mós harii ona eskola balun.
“Ita haree, durante ne’e, Konsellu Administrasaun Fundu Infraestrutura (KAFI) mós harii eskola, Planu Dezenvolvimentu Suku mós harii eskola, entaun iha 2020 orsamentu sira ne’e hotu sei sentraliza iha Ministériu Edukasaun mak bele haree fali instituisaun hirak ne’ebé prontu atu ajuda fali Ministériu Esukasaun hodi implementa programa hirak ne’e,” nia subliña.
Jornalista: Hortençio Sanchez
Editór: Xisto Freitas
