AHISAUN Fó Formasaun Ba Ema Ho Defisiénsia

DILI, 13 agostu 2019 (TATOLI)-Atu hasae koñesimentu ba ema ho defisiénsia nian, daudaun ne’e, Fundasaun AHISAUN oferese formasaun ba sira iha area lian inglés, komputadór ho artezanatu.
Diretór Fundasaun AHISAUN, Domingos T.M. dos Santos, hateten, iha tinan kotuk, fundasaun oferese ona formasaun ba ema hamutuk 95 no hosi númeru ne’e balun konsege hetan ona servisu iha instituisaun Governu, Organizasaun Naun Governmental (NGO) Nasionál no Internasionál.
“Ita haree katak iha tinan ida liu ba fundasaun AHISAUN fó formasaun ba ema ho defisiénsia no ema la ho defisiénsia hamutuk 95 hosi númeru ne’e balun hetan ona servisu no balun maka sidauk,” hateten Domingos dos Santos, ba Ajénsia TATOLI, ohin, iha Ai-mutin, Dili.
Fundasaun AHISAUN ho ninia misaun no vizaun maka oinsá halibur maluk defisiénsia sira ne’ebé iha talentu no abilidade atu bele asesu kampu servisu.
Durante ne’e fundasaun ne’ebé tau matan ba ema ho defisiénsia isin ne’e hetan apoiu osan hosi Ministériu Solidariedade Sosiál no Inkluzaun (MSSI) hodi fasilita formasaun no selu saláriu staff sira. Alende ne’e, hetan mós apoiu fundus hosi The Leprosy Mission Timor Leste hodi fasilita atividade artezanatu no advokasia.
Diretór ne’e akresenta, benefisiáriu fundasaun nian fahe ba parte rua, parte da-uluk maka membru pasivu no parte da-ruak maka membru ativu. Membru ativu sira hetan oportunidade hodi hela iha dormitóriu atu tuir formasaun no partisipa iha prosesu aprendizajen normal iha eskola públiku no privadu sira.
Ema ho defisiénsia hamutuk 20 maka daudaun ne’e hela iha dormitóriu fundasaun nian hodi tuir formasaun no eskola.
Iha fatin hanesan formadór iha área komputadór, Natalino Alex da Costa, hateten, daudaun ne’e ema ho defisiénsia 15 maka tuir hela kursu komputadór hahú hosi segunda feira to’o sesta feira, kada semana. Maibé partisipante ne’ebé la ho kondisaun defisiénsia hahú tuir de’it formasaun loron tolu, segunda feira to’o kuarta feira, kada semana.
Partisipante ne’ebé partisipa iha formasaun ne’e mai hosi munisípiu 12 inklui Rejiaun Administrativu Espesiál Oe-Cusse Ambeno (RAEOA).
Jornalista : Osória A. Margués
Editór : Francisco Simões

