DILI, 16 agostu 2019 (TATOLI)-Profisionál Saúde sira ne’ebé hakna’ar aan iha Hospitál Nasionál Guido Valadares (HNGV) hanesan médiku timoroan, kubanu, xineza; espesialista, jeneralista, enfermeiru, parteira, tékniku aliadus, tékniku radiolognéstiku, pediátria, sirurgia, medisina interna, farmasia no nutrisaun, banku urjénsia, laboratóriu no sala operasaun selebra loron valores iha HNGV tanba loron valores ne’e hanesan loron reflesaun ba profisionál saúde sira.
“Parseiru sira ne’ebé hamutuk ho ami iha ne’e brigada Kubanu, brigada xineza no Austrália liuliu St. Jhon of God ne’ebé mak durante hamutuk ho HNGV atu lori asisténsia ida di´ak liután husi oin ba oin ba pasiente sira,” informa Diretór Klíniku HNGV, Flávio Brandão liuhusi diskursu bainhira selebra loron valores, iha HNGV, sesta (16/08/2019).
Nia esplika, loron valores ne’e la´ós eventu ida ne’ebé mak atu demostra atinjimentu ne’ebé ita iha ona maibé liuhusi loron valores ne’e hanesan loron reflesaun ida atu médiku, parteira, infermeiru, tékniku aliadu hanesan servidor sira seluk, dasa rai ho ekipa sira ne’ebé mak fó asisténsia ba ema moras nune’e mós jerente sira to’o iha ministru atu idaidak bele refleta fali ita-nia aan oinsá papel ita nian ne´e sai servidór.
Diretór Klíniku HNGV dehan, profisaun médiku profisaun ne´ebé diferente tanba servi ho domin ho kompaisaun no servi ba umanidade no mos totalidade tomak ne´ebé durante fó asisténsia ba ema moras sira.
“Uluk ita hotu hatene katak profisaun ida ne’e hanesan vokasaun ida maibé agora ho tempu ida ne’e profisaun la´ós ona vokasaun de´it maibé oportunidade ba ema atu servisu. Entaun, valór sira ne’ebé mak metin ba profisaun atu sai mihis mós ba ita-nia leet,” kompara Diretór Flávio Brandão.
Tanba ne’e, tuir diretór ne´e, mak loron valores lori ita (profisionál saúde) refleta fila fali oinsá ita iha responsabilidade ida ke maka´as ba ita-nia profisaun no hafanu fila fali ita no husu ita idaidak niaa an saida mak halo ona ba iha ita-nia profisaun hanesan resposta nesesidade ema moras nian tanba iha ema moras mak buat ida hanaran Ministériu Saúde no ospitál ne’e iha.
“Ospitál ida ne’e mak lao iha tinan ba tinan ita rona kontente, lamentasaun hotu, desvalorizasaun no buat balun ema demostra katak kontenti iha komunidade nia le’et kona-ba ita-nia uma lisan HNGV no pozitivu tebes la´ós krítiku ne’ebé la diak maibe konstrutivu atu ita hothotu bele kontinua ba ita-nia aan hodi valoriza ba oin ho diak liután,” akresenta diretór ne´e.
Alende ne´e, Diretór Flávio kompara mós katak tinan sanulu ba kotuk HNGV la hanesan agora tanba iha buat pozitivu balun.
Entretantu, partisipa iha selebrasaun loron valores ne´e mak Vise-Ministru ba Dezenvolvimentu Estratéjiku no atuál Ministru Saúde Interinu, Bonifácio Maukoli dos Reis, Komisaun F Parlamentu Nasionál, Padre Kapelaun HNGV, família pasiente balun no mós funsionáriu HNGV sira.
Jornalista: Felicidade Ximenes
Editór : Rafy Belo
