DILI, agostu 2019 (TATOLI)-Embaixadór Indonézia ba Timor-Leste (TL), Sahat Sitorus hateten katak kontente ho planu governu atu hanaran ponte foun Bidau ho naran Ponte BJ Habibie tanba nia kontribuisaun.
“Kontente ne´e nu´udar ai-tonka maun-alin ida nian. Bainhira governu no lider povu Timor-Leste fó valorizasaun ba Habibie (Eis-prezidente Indonézia) no hanaran ponte ida iha Sidade Dili nia fuan, iha ne´ebé lorloron ha´u liu ba mai,” Embaixadór, Sahat Sitorus ba jornalista sira hafoin ramata isar bandera iha Embaixada Indonézia, Farol, Dili, sábadu (17/08/2019).
“Ha´u orgullu obra Indonézia ida di´ak tebes. Kuandu haree lala´ok istória Habibie nian, ha´u hanoin, sente onradu no respeitadu tebes, glorifikadu sempre ba nia naran,” nia akresenta.
Diplomata ne´e reforsa, nu´udar embaixadór nia parte la iha pergunta, la iha liafuan ida hodi dehan katak lae. “Ita kontente”.
Embaixadór Sahat Sitorus salienta, nu´udar sidadaun Indonézia nian, governu no povu Timor-Leste respeitu Habibie. “Tanba nia iha tempu ne´ebá nu´udar xefe estadu foti desizaun istórika.
Diplomata Sahat Sitorus haktuir liafuan Bung Karno (Prezidente dahuluk Indonézia nian) katak iha istória sempre iha vítima. Revolusaun istória konserteza iha ran fakar. “Tanba ne´e iha balun aseita, balun la aseita, ha´u hanoin ita husik ba istória,” nia konsidera.
Notísia relevante:Ponte Bidau Tau Naran Habibie Tanba Kontribuisaun
Jornalista: Nelia Fernandes
Editór : Rafy Belo
