DILI, 19 Agostu 2019 (TATOLI)—Embaixadór Japaun ba Timor-Leste, Hiroshi Minami, hala’o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.
Objetivu husi enkontru ne’e, atu hala’o despedida ho Xefe Estadu hafoin durante tinan rua hala’o kna’ar hanesan diplomata iha Timor-Leste.
Embaixadór Hiroshi Minami agradese ba kooperasaun nasaun rua, nune’e mós ba apoiu tomak ne’ebé nia simu durante hala’o kna’ar iha Timor-Leste.
Xefe Estadu mós fó apresiasaun ba misaun Embaixadór Japaun durante nia mandatu hosi tinan 2017 to’o setembru 2019.
Prezidente Repúblika espera prezensa embaixadór foun ne’ebé sei mai, bele hametin liu-tan relasaun serbisu ne’ebé di’ak ho órgaun estadu sira iha Timor-Leste.
Antes ne’e, Horoshi Minami mós despede ona Primeiru-Ministru, Taur Matan Ruak, iha Palásiu Governu, Dili.
Jornalista: Cipriano Colo
Editór: Xisto Freitas