DILI, 20 agostu 2019 (TATOLI)-Oitavu Governu Konstitusionál ne’ebé lidera husi Primeiru-Ministru (PM), Taur Matan Ruak, iha ona planu fiksu atu tinan-tinan rekruta membru FALINTIL-Forsa Defeza Timor-Leste (F-FDTL, sigla portugés) na’in 500 to’o 600.
Notísia Relevante : F-FDTL Banati Tuir Valores FALINTIL
“Governu hanoin ona oinsá mak tinan-tinan ita rekruta membru F-FDTL foun na’in 500 ou 600,” informa Ministru Defeza no Ministru Interiór ein-Funsaun, Filomeno da Paixão de Jesus, ohin, iha ámbitu selebrasaun aniversáriu FALINTIL ba dala-44 iha Kuartél Jenerál F-FDTL, Fatuhada, Dili.
Ministru Filomeno Paixão hatutan, MDS tau ona planu sei diskute bainhira aprova ona iha Konsellu Ministru no Parlamentu Nasionál mak sei realiza rekerimentu.
Ministru Defeza Filomeno da Paixão de Jesus afirma katak, ko’alia kona-ba rekursu iha F-FDTL la’ós haree de’it ba kuantidade rekursu umanu, maibé tenke haree mós haruka oinsá transforma koñesimentu ba membru F-FDTL sira hodi tuir formasaun iha rai li’ur.
MDS mós tau prioridade ba Instituto Defeza Nasionál (IDN) ne’ebé daudaun loke kursu ba membru F-FDTL ho Polisia Nasionál Timor-Leste iha nivel ofisiais, majór, tenente koronél ne’ebé atu sae diviza tenke tuir formasaun iha IDN.
Jornalista : Nelson de Sousa
Editór : Francisco Simões
