DILI, 24 agostu 2019 (TATOLI)-Diretór Nasionál Aprovizionamentu Ministériu Obra Públika (MOP), Quintiliano Afonso Belo, hatete empreza konsultór sira ne’ebé hakarak tuir kompetisaun ba estudu viabilidade no dezeñu detalladu sira ne’e tenke prienxe rekizitu ne’ebé fó sai husi MOP.
“MOP iha regra normál no lei dehan katak rekizitu simples atu empreza ida bele manán iha kompetisaun mak empreza sira tenke prienxe rekezitu sira no dokumentu mandatóriu ho di’ak no loloos ne’ebé mensiona iha BID document laran”, diretór ne’e afirma hodi responde dúvida empreza sira iha nia knaar fatin Kaikoli, ohin.
Diretór Quintiliano informa iha kompetisaun ba estudu viablidade no dezeñu detalladu ne’ebé MOP liuhusi Diresaun Nasionál Aprovizionamentu (DNA) loke ba estrada trosu 14 iha territóriu Timor-Leste tama ona iha faze shortlist.
“Konsultór sira ne’ebé organiza dokumentu sira tuir orden no loloos, nu’udar indikadór forte hodi bele tama iha shortlist”, katak.
Nia akresenta, bainhira konsultór ida organiza dokumentu la tuir termu referénsia (ToR) konkursu públiku no elejibilidade inklui kritéria avaliasaun (BID document) ne’ebé sira sosa iha DNA, signifika katak konsultór sira ne’e laiha kapasidade hodi organiza terrenu, liuliu bainhira halo ona serbisu iha kampu. Katak, bainhira organiza dokumentu ladi’ak signifika organiza terrenu mós sei ladi’ak.
Ho nune’e, hakarak ka lakohi dokumentu sira ne’ebé DNA presiza hanesan mensiona ona iha dokumentu BID importante tebes no nu’udar sasukat prinsipál.
“Hodi ami bele hatene kapasidade rekursu konsultór sira nian antes sira manán iha kompetisaun sira ne’ebé la’o daudaun ou sira konkorre”, Quintiliano afirma.
Konsultór sira ne’ebé la konsege pasa iha shortlist, husu para sira prepara aan di’ak liútan no haree filafali dokumentu sira nebe sira hatama tuir rekizitu ne’ebé DNA fó sai iha BID document purvolta pontu 17, inklui prebid no sitevisit.
“Karik rekizitu sira ne’e kompletu no hanesan ho rekizitu ne’ebé DNA fó sai, laiha dúvida no sira sei passa. Maibé kuandu la kompletu no latuir formatu ne’ebé DNA fó sai iha document BID, deskulpa DNA liuhusi komisaun sei deside no sira sei la pasa”, afirma.
Hafoin prosesu shortlist, Diretór Quintiliano dehan DNA hamutuk ho komisaun sei konvida ofisiál ba kada konsultór atu halo aprezentasaun kona-ba metodolojia no aprosimasaun ne’ebé sira uza iha estudu viablidade no dezeñu detalladu ba estrada no ponte sira.
Tanba ne’e Quintiliano fó hanoin mós ba konsultór sira atu prepara ekipa enjeñeiru sira ne’ebé identifikadu ona iha sira-nia dokumentu laran.
“Pelumenus tenke partisipa iha aprezentasaun ne’ebé ami sei organiza iha tempu badak. Nune’e, ikus mai komisaun hamutuk ho DNA deside konsultór ne’ebé merese liu hodi bele halo estudu”, akresenta.
ToR konkursu ne’e, kompañia tenke iha kapasidade atu halo estudu viabilidade ba impaktu jotékniku ambientál, sósiu-ekonomiku. Kompañia tenke iha konsulta, rejistu iha Timór no hala’o joint venture ho kompañia internasionál ne’ebé iha estudu ba área estudu sira.
Estudu sira ne’e sei hahú iha tinan ne’e, atu tinan oin (2020) hahú implementa projetu konstrusaun hodi atinje daudaun meta ne’ebé hakerek iha Planu Estratéjiku Dezenvolvimentu Nasionál.
Foin dahuluk iha Oitavu Governu Konstitusionál liuhusi MOP mak loke mós konkursu ba kompañia sira atu hala’o estudu viabilidade, molok Governu prevee osan ba konstrusaun.
Jornalista : Florencio Miranda Ximenes
Editora : Maria Auxiliadora
