DILI, 26 agostu 2019 (TATOLI)—Prezidente Tribunál Rekursu (PTR), Deolindo dos Santos, hala’o enkontru regulár ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.
Hafon enkontru, Deolindo esplika, durante enkontru ko’alia kona-ba prosesu dezenvolvimentu iha área judisiál, liliu iha área Tribunál nian.
Pontu prisipál ne’ebé PTR relata mak, primeiru kona-ba prosesu sira durante ne’e la’o lais no di’ak ka lae, liliu prosesu sira ne’ebé sei pendente hela, tanba iha buat balun ne’ebé la’o ona maibé balun presiza hadi’a tan.
Segundu, PTR aprezenta ba Prezidente Repúblika kona-ba kestaun ne’ebé iha relasaun ho primeira kestaun, katak, oinsá mak prosesu sira ne’e bele la’o lais no di’ak liu-tan, presiza iha mudansa balun iha juiz sira, ne’ebé serbisu iha Tribunál Primeira Instánsia sira.
Deolindo hatutan, ho forma ida ne’e mak prosesu pendente sira bele la’o di’ak no lais liu-tan. Kona-ba mudansa ne’e sei akontese iha loron 16 setembru tinan ne’e, iha movimentasaun judisiál.
Deolindo haklaken katak, antes to’o iha ne’e, sei iha mós desizaun balun husi konsellu nian, atu bele koloka juiz sira tuir planu konsellu nian, atu bele hala’o serbisu di’ak liu-tan, liliu iha Tribunál Distritál Dili, kona-ba prosesu sira ne’ebé komplexu.
Mudansa judisiáriu kona-ba juiz sira mak hanesan, juiz sira ne’ebé iha klasifikasaun di’ak, barak sei mai iha Tribunál Distritál Dili. Signifika, juiz balun iha Baucau, Suai no Oé-Cusse sei mai fali Dili no mós juiz sira ne’ebé iha Dili, balun sei ba fali Baucau, Suai no Oé-Cusse.
Tuir dadus, númeru kazu pendente to’o oras ne’e, Tribunál Rekursu rejista 100 resin, prosesu iha Tribunál Primeira Instánsia iha Baucau 400 resin, Suai 800 resin, Oé-Cusse 400 resin no Dili mak barak liu.
Jornalista: Cipriano Colo
Editór: Xisto Freitas
