DILI, 26 agostu 2019 (TATOLI)—Ikus-ikus ne’e, serbisu iha Fronteira Batugade konsege deteta movimentu ilegál barak tanba reforsa hosi serbisu intelijénsia no monta mós sistema Informasaun Teknolojia (IT) moderna.
Komandante Unidade Patrullamentu Fronteira (UPF) Postu Nuu-Badak Batugade, João Belo ba TATOLI iha Sentru Formasaun Polísia Komoro, ohin, hateten oras ne’e dadaun iha liña fronteira lansa tan estratéjia foun, kona-ba reforsa serbisu intelijénsia ne’ebé bele deskobre movimentu ilegál, liga ba krime transnasionál (transnational crime).
Aleinde ne’e, nia hatutan, implementa mós sistema Informasaun no Teknolojia (IT) ne’ebé modernu hodi fó apoiu maka’as atu taka limitasaun rekursu umanu ne’ebé iha.
Nia fó ezemplu katak iha fronteira uza ona drone no CCTV atu bele deteta movimentu ilegál iha fronteira. Maski nune’e, komandante ne’e seidauk garante pursentu 100, maibé garante de’it katak materiál no sistema hirak ne’e sei fó apoiu ba serbisu ne’ebé iha.
Nia subliña, ho prezensa teknolojia ne’ebé agora uza, bele hateten katak, aktu krime liga ba fronteira barak mak deskoberta.
Maski la sita detalla kona-ba rekursu umanu ne’ebé haruka ona ba tuir treinamentu iha espesializada kona-ba área ida ne’e no garante katak rekursu ba ida ne’e iha hela. Buat ne’ebé parte serbisu fronteira presiza liu mak treinamentu avansada, atu bele aprofunda no domina liu-tan teknolojia ne’ebé agora dadaun uza.
Atu asegura festa komemorasaun Tinan 20 Konsulta Populár no prezensa misaun INTERFET iha Timor-Leste, parte serbisu fronteira iha ona kooperasaun di’ak tebes, ho ajénsia interligadu sira iha fronteira hanesan F-FDTL, Polísia Militár, Kuarentina, Migrasaun inklui Komandu Munisípiu Liña Fronteira, hafoin hetan diretiva operasionál konjunta hosi nasionál.
Tuir dadus, durante fulan agostu, serbisu interligadu liña fronteira kaptura sidadaun ne’ebé lori atributu arte marsiál liuhusi dalan ilegál tantu tama no sai, hamutuk ema na’in 46.
Hirak ne’e hotu, parte serbisu fronteira, halo de’it prosesu identifikasaun, entrega ba parte komandu munisípiu seksaun investigasaun kriminál mak levanta ba Ministériu Públiku.
Rezultadu prosesu Tribunál nian, hosi ema na’in 46 ne’e, balun hetan Termu Identidade Rezidénsia (TIR), no balun prosesu sei la’o hela.
Jornalista: Cipriano Colo
Editór: Xisto Freitas
