DILI, 26 agostu 2019 (TATOLI)—Molok inísiu setembru, Tribunál Rekursu (TR) sei halo apresiasaun ba pedidu rua hosi Prezidente Repúblika kona-ba alterasaun Lei Atividade Petrolífera (LAP) no mós Lei Fundu Petrolíferu (LFP) hodi foti desizaun.
Prezidente Tribunál Rekursu (PTR), Deolindo dos Santos informa kestaun ne’e hafoin enkontru regulár ho Prezidente Repúblika (PR), Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.
Lee mós: PJR Halo Ona Pareser ba Lei Rua Ne’ebé Notifika Hosi TR
Deolindo informa, pedidu alterasaun ba lei rua ne’e oras ne’e sei iha Tribunál Rekursu, no TR rasik esforsu másimu iha kalan-loron oinsá foti desizaun ne’ebé di’ak no lais liu-tan iha tempu badak nia laran.
Kona-ba prazu, PTR esplika, normálmente loron 25 ba kazu konkreta, maibé ida ne’e Prezidente Repúblika hatuun ba loron 20 tanba Konstituisaun mak permiti.
“Iha kontestu ne’e, Tribunál Rekursu tenta atu desidi buat ne’e ba prazu legál nia laran. Signifika, to’o inísiu setembru, maibé Tribunál Rekursu mós labele taka matan katak presiza desizaun ne’ebé ho forma lalais”, informa Deolindo.
Jornalista: Cipriano Colo
Editór: Xisto Freitas
