DILI, 26 agostu 2019 (TATOLI)—Iha ámbitu Komemorasaun Tinan-20 Referendu no Misaun International Forces for East Timor (INTERFET), Xefe Estadu, Francisco Guterres Lú Olo liuhosi Dekretu Prezidente Repúblika númeru 40/2019, 26 agostu 2019, kondekora entidade no individu hamutuk na’in-17.
Komunikadu ne’ebé TATOLI asesu hosi Mídia Prezidénsia Repúblika, ohin, hateten, kondekorasaun ne’e nu’udar rekoñesimentu Estadu Timor-Leste ba sidadaun no entidade nasionál no estranjeiru nia kontribuisaun ne’ebé fó benefísiu ba Timor-Leste no umanidade.
Prezidente Repúblika fó kondekorasaun ba entidade no individu sira ne’ebé durante luta ba libertasaun Pátria serbisu hamutuk kompatriota timoroan iha diáspora hodi kontribui ba prosesu autodeterminasaun povu Timor-Leste.
Entidade no individu sira ne’ebé hetan kondekorasaun mak hanesan, Prezidente Repúblika kondekora Grau Grande-Colar da Ordem de Timor-Leste ba Bill Clinton, eis Prezidente Estadu Unidu Amérika no ba Kofi Annan, Eis Sekretáriu Jerál ONU ho títulu póstume.
Prezidente Repúblika kondekora Assembleia da República (República Portuguesa) no Governu República de Vanuatu ho Grau Colar da Ordem de Timor-Leste.
Marie Colvin, sidadaun hosi Estadu Unidu Amérika simu kondekorasaun ho Grau Medalha da Ordem de Timor-Leste ho títulu póstume. Australian Council of Trade Union, Andrea Neeham, sidadaun Británika, Angie Zeltner, sidadaun Británika, Joanna Wilson, sidadaun Británika, Lotte Kronlid, sidadaun Británika, Irena Cristalis, sidadaun Olandeza, Minka Nijhuis, sidadaun Olandeza no Fernando de Mendonça d’Oliveira, sidadaun Portugés.
Michael Hodgman hosi Austrália kondekoradu ho Grau Insígnia da Ordem de Timor-Leste, ho titúlu póstume. Marc R. Pacheco hosi Estadu Unidu Amérika, António Sampaio hosi Portugal no Chalida Tajaroensuk hosi Tailandia hetan kondekorasaun ho Grau Insignia da Ordem de Timor-Leste.
Jornalista: Cipriano Colo
Editór: Xisto Freitas
