DILI, 26 agostu 2019 (TATOLI) – Horsehik (25/8), Servisu Migrasaun Postu Fronteira Batugade halo rekuzasaun ba timoroan na’in 76 ne’ebé atu halo viajen ba Indonézia hodi haruka sira fila tanba ho objetivu la Klaru.
Maski la esplika detalla kona-ba Lei Migrasaun, maibé Komandante Servisu Migrasaun, Superintendente Agostinho Gomes, hateten rekuzasaun ne’e atu implementa Lei Migrasaun nian, hodi konsiensializa sidadaun hotu katak tenke iha obrigasaun atu kumpri.
“Sidadaun hotu iha obrigasaun no responsabilidade atu kumpri Lei Migrasaun, tanba Timor-Leste nu’udar nasaun soberania”, hateten nia iha Akademia Polísia Comoro, ohin.
Bainhira husu kona-ba karik sidadaun hirak ne’e deskonfia involve grupu Arte Marsiál ilegál ruma, komandante ne’e informa, órgaun Polísia Kriminál Servisu Migrasaun Postu Batugade ho nia kompeténsia tomak atu identifika timoroan 76 ne’e, bainhira hakarak atu hakat liu fronteira ho legálmente (uza pasaporte), maibé objetivu mak la klaru.
“Bainhira Servisu Migrasaun halo rekuzasaun, kompriende katak ne’e iha buat ruma”, hateten nia.
Bainhira polísia halo identifikasaun, Agostinho haktuir, timoroan 76 ne’e hotu-hotu ho objetivu ida de’it katak hakarak ba haree avó moras iha Indonézia.
“Hotu-hotu dehan avó moras “, nia konta tuir. Liu-tan ida ne’e, bainhira polísia husu kona-ba avó moras iha ne’ebé, maibé la aprezenta fatin destinasaun loloos no maioria la hatene fatin.
Aleinde ne’e, hotu hotu la lori osan liu $10 atu bele sustenta moris durante estadia iha Indonézia. Ho ida ne’e maka Servisu Migrasaun la autoriza hodi sai hosi fronteira.
Hafoin identifikasaun, Servisu Migrasaun serbisu hamutuk ho Polísia Unidade Patrollamentu Fronteira (UPF) no Polísia Militár (PM) hosi FALINTIL-Forsa Defeza Timor-Leste, hodi transporta kedas mai Dili, no haruka sira fila ba ida-idak nia fatin, tanba sira mai hosi munisípiu oioin.
Hosi númeru ne’e, sira mesak idade produtivu (joven), inklui feto na’in rua.
Komandante ne’e hateten, identifikasaun ne’e Servisu Migrasaun sei kontinua halo iha futuru atu bele hanorin sidadaun sira.
Nune’e mós, Komandante UPF Postu Batugade, João Belo reforsa katak sidadaun hirak ne’e atu hakat ba nasaun viziñu ho legálmente uza pasaporte, maibé fatin destinasaun no objetivu la klaru. Ne’e mak Servisu Migrasaun haruka fila.
Tanba ne’e, UPF hamutuk ho PM no Unidade sira seluk transporta hikas mai Dili atu ida-idak bele fila ba nia munisípiu.
Jornalista: Cipriano Colo
Editór: Xisto Freitas
