DILI, 26 agostu 2019- Sentru Laboratóriu Sidadania, Universidade Nasionál Timor Lorosa’e (UNTL) kolabora ho Sentru Estudu Paz lansa espozisaun ho tema” Ética e da Resistência e os Tratados da Independência” hodi komemora loron Konsulta Populár ba dala 20 hodi relembra fila fali atividade luta ba libertasaun país nian.
“Ida nee hanesan momentu ida atu haree fali ita-nia istória ida habelar nafatin ba ita-nia estudante sira atu nune’e sira bele hatene kona-ba istória Timor-Leste nian atu bele kuda espíritu nasionalizmu no patriotizmu katak ukun aan ne’e la’ós monu mai de’it husi lalehan maibé ita rasik maka hala’o no enfrenta susar no terus oioin,” hateten Reitór UNTL, Francisco Miguel Martins perante mídia sira iha Kampus Sentrál, UNTL, segunda ne’e.
Reitór ne’e reforsa liután katak jerasaun foun sira ne’e maka sei sai lideransa ba iha nasaun ida ne’e. “Sira tenke tau iha sira-nia fuan, atu nune’e bele konstroi nasaun ida ne’e no dezenvolve nasaun ida nee ho responsabilidade tomak ba futuru,” hateten akadémiku ne’e.
Entretantu, espozisaun Sentru Laboratóriu Sidadania, UNTL, kolabora ho Sentru Estudu Paz ne’e kona-ba istória Timór nian hahú kedas husi funu liga ho tolu Frente Armada, Frente Klandestina no Frente Diplomátika, ne’ebé maka alkansa ita-nia vitória, too mai iha tinan 1999, referendum. Espozisaun ne’e sei ramata iha Novembru.
Notísia relevante:País Ida Laiha Memória, Laiha Futuru
Jornalista : Nelia Borges
Editór : Rafy Belo
