DILI, 29 agostu 2019 (TATOLI)—Koordenadór Sentru Múzika Berliku Fanu Rai (BRF), Eduardo “Kiera Zen” Ximenes, ohin, informa komemorasaun Loron Konsulta Populár iha Tasitolu aban (sesta, 30 Agostu 2019), Orkestra Berliku Lian ne’ebé hamahan-aan iha Sentru Múzika BFR (Berliku Fanu Rai) nia knua, simu fiar atu hananu ai-knananuk haat ho kompozisaun orkestra
“Orkestra Berliku Lian ne’ebé hamahan-aan iha Sentru Múzika Berliku Fanu Rai, simu fiar husi Komisaun Organizadora atu hananu knananuk haat (4) ho kompozisaun orkestra ba múzika haat hanesan múzika Oras To’o Ona, Loron Aban Hahú Ohin, Suru-Boek no múzika Prezidente Nicolau,” dehan Koordenadór Orkestra Berliku Lian no Sentru Múzika Berliku Fanu Rai (BRF), Eduardo “Kiera Zen” Ximenes, ba Ajénsia TATOLI liuhusi rede sosiál, kinta (29/8/2019).
Maske nune’e, nia hatutan, komisaun organizadora husu atu sira-nia grupu múzika rezerva tan múzika tolu (3) hanesan Uluk Ami Atoni, Masi Nana (dialetu Tokodede) no Lian ba Lian ho kompozisaun Combo (banda). Preparasaun ida ne’e, atu antesipa hodi hein konvidadu espesiál sira to’o iha fatin, molok hahú serimónia solene, sira mak sei diverte.
Liuhusi konsertu múzika ba komemorasaun Loron Konsulta Populár ba dala-20 ne’e, nia esplika, hanesan momentu istóriku ida ne’ebé atu fó hanoin ba jerasaun tuan sira kona-ba idade rai ne’e nian no nia oan sira nian.
“Iha momentu ida ne’e, liuhusi múzika, ita hotu halo reflesaun ida-idak nian kona-ba luta, kona-ba prezente (loron aban), hodi hanoin oinsá mak ita ida-idak bele prepara-aan ba sosiedade Timor ida mais seguru, pás no prósperu, sei la ‘halo todan’ hotu monu loos de’it ba estadu ne’e nia kabaas,” Kiera Zen hateten.
Entretantu, kona-ba preparasaun, nia dehan, bainhira sira simu konfirmasaun husi komisaun organizadora katak sira mak aprezenta orkestra iha Tasitolu entaun sira halo preparasaun intensivu kuaze fulan ida-nia laran. Estudante hotu hahú mai prepara ai-knananuk haat (4) ne’e entaun intensidade ba preparasaun sai aas tebe-tebes hodi ezije ba malu atu halo buat di’ak ida, tanba ami sente tinan 20 ne’e tinan istóriku ba foin-sa’e sira.
“Ami sente katak, formatu múzika ne’ebé ami sei aprezenta ne’e, sai buat foun ida iha palku públiku iha Timor-Leste. Tanba ne’e, aleinde estudante sira prepara, ho Sekretáriu Estadu Juventude no Desportu (SEJD) nia tulun, ami lori mós profesór na’in tolu (3) husi Indonézia, mai tulun prosesu preparasaun ne’e,” nia dehan.
Tanba ne’e, nia informa, Berliku Fanu Rai (BRF) rasik sente katak eventu ne’e sai momentu istóriku ida tanba ne’e BFR halo kualkér forma posivel atu aprezenta duni rezultadu foin-sa’e sira-nia aproveitamentu ba públiku.
Nune’e, tuir nia, ho Prezidente Komisaun Organizadora Xanana Gusmão nia autorizasaun, ami lori rasik ami-nia palku, son no ekipamentu iluminasaun ba monta, sein husu governu selu ami. Sekretáriu Estadu Arte no Kultura (SEAC) rasik mak fó duni osan $500 atu ami uza hodi selu crew no mobilizasaun ba loron haat (4) durante halo preparasaun.
Aleinde mobiliza sasán rasik, nia haktuir, BFR mós mobiliza apoiu husi estudante UNTL sira, husi Departamentu Komunikasaun atu halo dokumentáriu kompletu ida ba ami-nia preparasaun. Ekipa dokumentáriu ne’e lidera husi profisionál ida husi Indonézia hodi halo dokumentáriu video no retratu hodi publika rede sosiál sira inklui prodús dokumentáriu kompletu iha formatu video nu’udar rekordasaun ida.
Entretantu, nu’udar artista no timoroan ne’ebé kriativu, nia hato’o ninia reflesaun kona-ba komemorasaun loron Konsulta Populár katak nu’udar sidadaun baibain ida, nia tenke realístiku. Katak, nia laiha posibilidade atu bele sai hanesan Xanana Gusmão, Ramos Horta no Mari Alkatiri maibé nia konsiente ho saida mak nia bele halo iha nia moris.
“Ha’u obriga-aan atu sai konsiente ho ha’u-nia bele, serbisu ho saida mak ha’u iha, hodi fó espasu ba foinsae sira no maluk seluk, atu bele sai saida mak sira bele sai, hodi kontribui no haboot ka hamorin Timor-Leste,” nia esplika.
Tanba, nia haktuir, sosiedade Timor-Leste ne’e atu sai oinsá iha futuru, timoroan determinadu katak jerasaun 1970-1999 mak tenke tulun hatuur. Atu diak ka aat, sala ka loos, katuas sira halo ona sira nia parte. Daudaun ne’e, ba jerasaun foun sira be tuir mai, iha responsabilidade morál atu kontribui sira-nia parte. Bainhira ita kontribui sala, ita rasik mak sei estraga destinu ne’ebé sala ba futuru sosiedade Timor nian.
Jornalista: Cancio Ximenes
Editór : Rafy Belo
