DILI, 30 agostu 2019 (TATOLI)—Xefe Estadu, Francisco Guterres Lú Olo fó hanoin katak rejionalizasaun liuhusi rejiaun espesiál-sira hanesan Rejiaun Administrativa Espesiál Oé-Cusse Ambeno (RAEOA), sei presiza lei ne’ebé klaru no konsistente husi Governu Sentrál atu garante dezenvolvimentu seguru ba Zonas Ekonomia Sosiál no Merkadu.
“Ita hahú ona prosesu desentralizasaun, maibé sei iha dalan naruk ida hodi la’o. Iha ámbitu desentralizasaun no poder lokál, ita sei presiza hadi’ak liután prosesu munisipalizasaun hodi harii munisípiu-sira ho autonomia finanseira no administrativa loloos, ho funsionamentu efikáz, transparente, partisipativu no demokrátiku,” Prezidente Repúblika ko’alia kestaun ne’e liuhusi ninia deskursu iha Komemorasaun Loron Konsulta Populár ba dala 20 iha Tasi Tolu, Dili, ohin.
Nia hatutan, sei iha duni dalan naruk ida hodi la’o atu kontinua harii no dezenvolve demokrasia no estadu hodi garante katak povu bele espresa no dezenvolve kultura no vontade polítika bele afirma nafatin identidade nasionál.
“Buat sira ne’e hotu ita sei hetan bainhira ita bele garante sidadaun sira-nia partisipasaun demokrátika, iha prosesu tomak no bainhira ita bele hetan rezultadu ekonómiku no sosiál, ne’ebé fó benefísiu no lori progresu ba ita hotu-hotu,” Lú Olo esplika.
Jornalista: Cipriano Colo
Editór: Xisto Freitas
