DILI, 2 setembru 2019 (TATOLI) – Sekretáriu Estadu Juventude no Desportu, Nélio Isaac Sarmento, hateten tinan oin Governu sei kria atividade foun nune’e bele fó atensaun ba serbisu Konsellu Polísiamentu Komunitáriu (KPK) bele serbisu di’ak liután hodi fó asisténsia iha suku sira.
“Ohin, Primeiru-Ministru bolu ha’u hamutuk ho Ministru Interiór ko’alia asuntu ida importante katak iha tinan oin ita iha kompromisu foun ida relasiona oinsá mak organiza Konsellu Polísiamentu Konunitáriu sira di’ak liután hodi fó asisténsia iha kada suku,” Nélio ba jornalista iha Paláçio do Governo, ohin.
Nia dehan, haree ba serbisu KPK nian iha terrenu maioria hosi joven, tanba ne’e tinan oin Governu planu ona atu grupu refere organiza mós eventu importante ne’ebé hala’o iha suku laran.
“Antes ne’e, KPK organiza hosi Ministériu Interiór, maibé agora ba oin Governu sei apoiu mós orsamentu ba sira tanba ne’e mak ohin Primeiru-Ministru bolu ami mai ko’alia atu orsamentu ne’ebé apoiu ba sira kanaliza hosi Sekretáriu Estadu Juventude no Desportu no tanba relasiona ho KPK seidauk harii iha suku hotu entaun ami sei haree hodi harii fali KPK iha suku sira no sei koordena ho Komandu Polísia Nasionál Timor – Leste, nune’e sira bele hetan subsídiu ne’ebé Governu oferese,” tenik Nélio.
Tuir nia, orsamentu ne’ebé Governu oferese tinan ida dala ida, entaun sira (KPK) tenke organiza aan halo didi’ak nune’e bele fó prestasaun di’ak ba sira-nia suku ida-idak.
Antes ne’e, KPK hala’o kna’ar hodi ajuda Polísia Nasionál Timor – Leste (PNTL) hodi fó seguransa suku maibé seidauk kobre iha suku hotu iha Dili laran.
“Fiar katak ba oin sei organiza di’ak liután KPK sira la’ós fó seguransa de’it maibé oinsá sira mós bele organiza mós atividade seluk sira hanesan desportu nian no seluk-tan no KPK sira-nia responsabilidade mós mak ne’e, suku tenke hakmatek, tenke moos no tenke hadook hosi komflitu,” nia haklaken.
Jornalista: Hortençio Sanchez
Editór: Xisto Freitas
