DILI, 09 setembru 2019 (TATOLI) – Ministériu Edukasaun Juventude no Desportu (MEJD) liuhusi ninia planu implementasaun programa Eskola Ensinu Rekorrente iha Munisípiu neen la’o tinan tolu ona. Programa ne’e rasik taka ba estudante sira ho tinan ki’ik tanba idade ki’ik iha oportunidade tuir eskola formál.
Diretór Ensinu Rekorrente (DER), Miguel R. Martins hateten tinan ida ne’e sira iha totál númeru estudante hamutuk 195 mak sei partisipa iha ezame nasionál no hahú iha loron 14 outubru 2019.
Númeru sira klasifika ona estudante sira ho idade tinan 15 ba leten tanba ho idade boot la hetan ona oportunidade iha edukasaun formál tan ne’e MEJD liuhusi DER buka tuir estudante sira ne’e atu kompleta fali sira nia eskola hodi hetan mós diploma formál.
Tanba estudante sira barak abandona sira-nia eskola tan de’it balun grávida, balun problema família. Ne’e duni liuhusi programa edukasaun naun-formál ne’e bele hakbesik fali estudante sira ne’e ba edukasaun.
“Agora ita-nia alin sira ho idade sei ki’ik la tama iha programa Ensinu Rekorrente ne’e tanba sira sei hetan oportunidade atu hetan edukasaun formál. Ne’e duni laiha razaun sira atu tuir programa ne’e,” informa Diretór Miguel R. Martins ba Jornalista Ajénsia TATOLI iha ninia Gabinete Ensinu Rekorrente Vila Verde, segunda (09/09/2019).
Nia mós informa katak númeru estudante ensinu rekorrente 2019 nian feto iha de’it 57 mane mak 138 ne’e hatudu katak tinan ne’e volume partisipasaun feto sira nian menus iha área edukasaun kompara ho tinan hirak liu ba kotuk feto barak mane.
Programa ne’e hahú ona iha Munisípiu neen mak hanesan Baucau, Manatutu, Dili, Aileu Ermera no Liquiça. Tinan oin sei iha planu atu loke tan iha Maliana no Oe-Cusse.
Ezekutivu ne’e konsidera katak maske programa ne’e la tinan tolu ona maibé vontade estudante sira nian atu partisipa iha programa ne’e menus liu. dala barak sira haruka ekipa sira tun ba baze hodi hamaus estudante sira atu mai fali eskola.
“Ida ne’e ita tenke halo, se lae sira la mai tan ne’e mak to agora ita bele dehan foin mak hetan totál estudante ba tinan tolu seidauk atinje mil (1000),” dehan nia.
Notísia relevante:Estudante Hakotu Eskola Na’in 300 Mak Partisipa Ona Ensinu Ekivalente
Jornalista : Tome Amado
Editór : Rafy Belo
