DILI, 11 setembru 2019 (TATOLI) – Banku Sentrál Timor-Leste (BSTL) realiza konferénsia internasionál ba dala-23 no Asembleia Jerál Asosiasaun Supervizór Seguru Luzófonu da-16.
Vise-Governadór BSTL, Venancio Alves Maria, hatete eventu anuál ne’e halo kada tinan ne’ebé partisipa hosi país membru sira ne’ebé ko’alia lian-portugés.
“Timor-Leste iha oportunidade sai hanesan uma-na’in ba dala rua, dahuluk iha tinan 2010. Ne’e hanesan konferénsia anuál ba dala-23 no Timor-Leste sei simu mós prezidénsia hosi São Tomé e Príncipe hodi lidera bá oin”, Vise-Governadór ba jornalista sira hafoin abertura ba konferénsia ne’e iha Otél Novu Turizmu, ohin.
Atividade ne’e importante tebes tanba peritu sira fahe esperiénsia, ideia, dezafiu no oportunidade bá oin halo oinsá maka jere, hadi’a setór seguru (asuransi) ne’e di’ak liu no bá futuru oinsá rezolve dezafiu sira.
“Matéria ne’ebé koloka primeiru maka fahe esperiénsia, hanesan estudu ba kazu hosi nasaun balu relasaun ho setór seguru ou asuransi. Iha eventu ne’e iha mós matéria balu ko’alia kona-ba oinsá prevene brankeamentu kapitál iha setór seguru”, Venançio relata.
Venancio Alves Maria hatutan BSTL fiar katak ho partisipasaun hosi entidade hothotu no papél hosi autoridade supervizór bele kontrola di’ak liután brankeamentu kapitál la’ós de’it iha setór seguru más iha setór hotu.
“Kona-ba dezafiu nu’udar nasaun foun sempre iha, más fiar aan katak ho esforsu entidade hotu buat hothotu sei bele la’o tuir lei haruka. Liga ba kazu brankeamentu kapitál iha ha’u-nia koñesimentu seidauk akontese kazu boot no afeta ba Timor-Leste, más presiza vijilante”, katak.
Konferénsia internasionál ne’e hala’o durante loron tolu hahú iha kuarta (11/09) no sei remata iha sesta (13/09) setembru ne’e. Entidade internasionál ne’ebé partisipa mai hosi Angola, Mosambike, Makau, Kabu-Verde, no Malázia.
Jornalista : Antónia Gusmão
Editora : Maria Auxiliadora
