DILI, 11 setembru 2019 (TATOLI) – Eis-Sekretária Ezekutiva UNESCO (Organizasaun Nasaun Unida ba Edukasaun no Kultura-sigla inglés) Interina, Cedeliza F. dos. Santos despede Ministériu Ensinu Superiór, Siénsia no Kultura (MESSK) hodi asume hikas kargu foun nu’udar Sekretária Jerál (Sekjer), iha Parlamentu Nasionál (PN).
Iha serimónia despedida ne’e, Cedeliza F. dos Santos haktuir, nia servisu iha UNESCO hahú iha 2012 hanesan membru baibain maibé depois tinan rua liutiha ulun-boot UNESCO iha Timor-Leste avalia servisu ne’ebé nia halo no ikus mai deside hodi tulan responsabilidade hanesan ofisiál Finansa durante tinan rua.
Iha 2017 nia hetan priviléjiu kuandu Eis-Sekretária Ezekutiva UNESCO, Maria Angelina Sarmento hetan fiar husi PLP (Partidu Libertasaun Populár) hodi asume fali kna’ar foun nu’udar Vise-Prezidente Parlamentu Nasionál entaun konfiansa ne’e husik hela ba nia nu’udar interina to’o 2019.
Maibé kna’ar ida ne’e mós nia hala’o tinan rua de’it tanba ambiente foun ne’ebé nia hili ona ne’e duni liuhusi serimónia hands over ne’e, Cedelizia entrega hikas kna’ar ne’e ba Sekretáriu Ezekutivu Interinu, Francisco Barreto, atu kontinua ba oin
Durante tinan hitu servisu iha UNESCO, manan esperiénsia barak uainhira serbisu hamutuk ho Ministériu Edukasaun hodi tau-matan ba eskola sira iha Timor-Leste.
“Ami ninia orientasaun hamutuk ho Ministériu Edukasaun atu haree liubá eskola ensinu báziku nian. Maibé, depois VIII governu haluan tan área edukasaun hodi hamosu Ministériu Ensinu Superiór Siénsia no Kultura, entaun ami fokus ba área refere,” tenik Eis-Sekretária Ezekutiva UNESCO Interina, Cedeliza F. dos. Santos ba Ajénsia TATOLI iha salaun Fundu Dezenvolvimentu Kapitál Umanu (FDCH), kuarta (11/09/2019).
Nia haktuir, área edukasaun ne’ebé sira perkorre haree ba kultura, siénsia no komunikasaun servisu kulturál ne’ebé hatudu ona progresu mak lansamentu livru kona ba uma lulik nian iha Munisípiu rua; Lautem no agora hahú tan halo peskiza ba uma lulik iha Viqueque tanba agora daudaun Viqueque sai fatin grande projetu.
Entaun peskiza ida ne’e sira halo hodi konserva didi’ak dadus sira ne’e hodi asegura iha database (baze dadus).
Husi programa UNESCO nian loke mós knua prátika no laboratóriu siénsia matemátika, fízika no kímika iha Dili inklui munisipiu lima hodi nune’e bele ajuda estudante sira atu lee barak liután.
“Ita hatene katak estudante sira estuda barak ho teoria de’it maibé laiha pratika sei la bele ajuda sira-nia abilidade entaun programa ne’e ita realiza ona no estudante sira iha área refere aproveita ona oportunidade sira ne’e,” dehan Eis-Sekretária Ezekutiva UNESCO Interina ne’e.
Nia mós dehan, servisu ne’ebé mak nia sei halo iha PN mak sei kontinua serbisu sira ne’ebé seidauk ramata. “Buat ne’ebé di’ak ona kontinua ba oin no servisu ne’ebé la di’ak buka atu hadi’a”.
Eis-Sekretária Ezekutiva UNESCO Interina, Cedeliza F. dos. Santos, tuir informasaun preliminária TATOLI asesu husi parte balun konfirma katak serimónia pose ba Sekjer PN foun ne’e sei realiza iha sesta (13/09/2019).
Jornalista: Tomé Amado
Editór : Rafy Belo
