LIQUIÇÁ, 11 agostu 2019 (TATOLI) – Diretór Terra Propriedade Munisípiu Liquiçá, Tito Serrão da Silva, hateten órgaun Estadu tenke iha komunikasaun iha kualkér desizaun, nune’e labele impede dezenvolvimentu.
Diretór ne’e konsidera Tribunál la ezerse ninia funsaun ho loloos, tanba molok foti desizaun tenke konsulta entidade relevante hotu ne’ebé iha relasaun ho asuntu rai nian.
“Ha’u seidauk ba presta deklarasaun ruma iha Tribunál, advogadu ida mós seidauk mai intervista ho ha’u, ida ne’e ita la konkorda tanba ita tau interese maka’as liu ba dezenvolvimentu, normalmente ha’u sempre dehan ba ita-nia sidadaun sira katak ida ne’ebé iha problema ho Estadu labele impede dezenvolvimentu, maibé nia reklamasaun la’o ba Tribunál no Tribunál bolu mak ita ba responde’’, nia tenik ba Agência TATOLI, kuarta ne’e.
Notísia Relevante: DTP Liquiçá Laiha Koñesimentu Prezensa Kompañia Marino Enterprise
Nia dehan, rai hosi Tibar to’o Loes ne’e área Liquiça nian, tanba ne’e nia prontu defende Estadu kona-ba rai ne’ebé kompañia Marino Enterprise kestiona.
“Ita mesak órgaun Estadu nian hotu, maibé dalaruma ita foti desizaun la halo konsulta ba malu, kuandu kazu ona tenke iha konsulta molok atu hola desizaun. Ami iha baze ne’e atu halo avaliasaun ruma ami tenke konsulta ema barak, atu nune’e desizaun ne’ebé ita foti ne’e loos no tuir lei, nune’e ita bele enkoraja parte ne’ebé sente lakon nia direitu, nune’e desizaun ne’ebé ita foti justu no tuir lei”, nia akresenta.
Tito Serrão haktuir, bainhira lansamentu fatuk ne’e autoridade másimu hosi Estadu mós partisipa, tanba ne’e kompañia China Harbour mak bele ke’e fatuk ne’e tanba prienxe ona rekezitu.
“Ikus mai tribunál foti desizaun hodi halo kanselamentu no blokeia fali área esplorasaun fatuk ne’e, ita apela ba futuru labele akontese tan kazu hanesan ne’e, tanba kontradiz ho desizaun autoridade sira seluk nian. Ita-nia Ministru Justisa mak asina kontratu ne’e hodi fó fatin hodi esplora fatuk ba konstrusaun portu Tibar ninian’’, nia kestiona.
Nia hatutan: “Tribunál foti desizaun la tetu ba interese Estadu nian, ida ne’e mak ita triste, ba futuru tenke konsulta nune’e desizaun Tribunál ita bele konsidera no valoriza tanba órgaun ne’ebé kaer justisa’’, nia subliña.
Jornalista: Evaristo Soares Martins
Editór: Xisto Freitas
