METINARO, 12 setembru 2019 (TATOLI)-Komandu FALINTIL-Forsas Defeza Timor-Leste F-(FDTL), ohin, kontinua hala’o serimónia transferénsia podér hodi nomeia Tenente Koronél, Cezario Marçal Ximenes “Haksolok” troka Komandante Sentru Formasaun Terrenu (SFT) Tenente Koronél, Celestino Pinto “Daeleba”.
Notísia Relevante : Tenente Koronél Armindo Nunes Komanda Komponente Apoiu Servisu
Serimónia entrega podér hala’o liu husi parade militár hodi entrega mós relatóriu servisu husi Komandante sesante SFT, Tenente Koronél, Celestino Pinto “Daeleba” ba Komandante foun Haksolok, ne’ebé asiste husi Vise Xefe Estadu Maiór Forsas Armada, Brigadeiru Jenerál, Falur Rate Laek iha Metinaro, Dili.
Nomeasaun ba komandante foun ho mandatu tinan rua bazeia ba dekretu Prezidente Repúblika, Francisco Guterres Lú Olo nu’udar mós Komandante Supremu Forsa Armada nian.
Notísia Relevante : Kapitaun João da Silva Troka Adão Brito Lidera Komponente Navál
Hafoin simu pose, Tenente Koronél, Cezario Marçal Ximenes “Haksolok” promote sei koordena ho nia ierarkia komandu atu dezenvolve rekursu umanu iha SFT inklui mós dezenvolve infra-estrutura SFT nian durante nia mandatu.
Haksolok dehan, SFT mak fatin ida atu fó formasaun no treinu forsa sira sai militár ida ne’ebé dixiplina no prepara sira nia mentalidade di’ak presiza iha kondisaun reforsa ekipamentu no fasilidade treinamentu oin hanesan kursu ba diviza sarjentu no prasa no kapitaun nian.
“Ha’u sei dezenvolve makas liu maka hadi’a rekursu umanu ita nia forsa sira no investe iha ekipamentu, tanba ita ema atu profisionál presiza apoiu,” afirma Haksolok.
Nia dehan, ohin loron membru F-FDTL iha 2.000 liu, maibé sei falta ekipamentu inklui infraestrutura ne’ebé bele suporta SFT.
Fatin hanesan, Vise Xefe Estadu Maiór Forsas Armada, Brigadeiru Jenerál, Falur Rate Laek husu ba komandante foun atu kontinua dezenvolve SFT nu’udar fatin dixiplina no eduka militár sira atu sai forsa ida ne’ebé profisionál liután.
“Ha’u husu ba komandante foun atu fó atensaun espesiál ba konsiderasaun bázika sira hanesan manutensaun dixiplina nian iha setór hotu- hotu atu garante F-FDTL nia profisionalizmu iha públiku nian matan,” Falur hateten.
Falur dehan, ba se de’it atu sai forsa sei tuir treinamentu iha SFT, atu hatene oinsá moris iha dixiplina nu’udar fatór importante atu atrai povu Timoroan tomak kontribui ba pás no estabilidade nasionál.
Falur husu ba Komandante Haksolok atu kontrola membru sarjentu no prasa sira atu moris orientada atu kumpre tarefa kontrola membru sira lor-loron hodi evita fallansu problema labele mosu iha fin de semana no lisensa ba ferias sira.
Lori Komandu F-FDTL nia naran, Falur Rate Laek hato’o agradese mós ba Komandante Sesante, “Daeleba” durante assume knaar tinan tolu halo mudansa no progresu barak iha SFET iha área formasaun, treinamentu avansadu oin-oin.
“Agradese ba komandante sesante ninia mandatu durante tinan rua hatudu progresu barak ba ita nia Instituisaun F-FDTL,” tenik nia.
Komandante Sesante Koronél Celestino Pinto “Daeleba” espera komandante foun kontinua dezenvolve SFT atu hadi’a di’ak liu tan kondisaun no aumenta infraestrutura sira ne’ebé sei menus.
Jornalista : Eugénio Pereira
Editór : Francisco Simões
