DILI, 12 setembru 2019 (TATOLI)-Ministériu Turizmu Indonézia liuhusi KBRI (Kedutaan Besar Republik Indonesia), realiza Programa Famtrip-Familiarization Trip Media Timor-Leste hodi vizita fatin turizmu hanesan Salib Kasih, Pemandian Air Soda, Huta Ginjang, Taman Eden, Kaldera, Karnaval Pesona Danau Toba iha Baliigi, ho objetivu hametin relasaun entre Timor-Leste ho Indonézia iha área turizmu .
Jornalista timoroan sira ne’ebé integra iha Programa Famtrip ne’e hamutuk na’in sanulu hanesan Pedro Alves Martins, Francisco P. Oqui, João António X. Guterres, Evander Agustinho Lopes, Florindo Coluna, Ezequel das Neves, Jacinta Sequeira, João Basílio da Costa, Alvir Oliveira no Avério Ximenes. Jornalista sira ne’e kompostu husi mídia imprensa no eletrónika sira.
“Vizita ne’e ba segundu vez, depois lori mídia sira atu fó koñesimentu kona-ba fatin turizmu ne’ebé iha indonézia no bele aprende liután buat ne’ebé iha ne’ebá,” dehan Reprezentante KBRI, Julio Cesar ba Ajénsia TATOLI, iha Aeroportu Internasionál Nicolau Lobatu Comoro, Dili, ohin.
Reprezentante KBRI, ne’e informa, ho programa vizita ne’e, jornalista sira bele mai fahe fali informasaun ba ita-nia maluk Timor atu nune’e sira bele aplika fali iha Timór, husi setór turizmu ne’ebé sira hetan.
“Tanba ita hatene katak ita-nia setór turizmu barak mak falta. Ne’ebé, ho viajen ida ne’e bele hatene liután kona-ba saida mak iha Danau Toba ne’ebá, esperiénsia saida sira aprende iha ne’ebá, bele mai aplika fali iha rai Timór atu nune’e ita bele dezenvolve di’ak liután ita-nia turizmu iha rai laran,” tenik Reprezentante Julio Cesar.
Reprezentante KBRI ne’e hateten katak asaun ida ne’e hala’o tanba Embaixada Indonézia haruka ita-nia mídia ba, atu fahe esperiénsia mídia nian iha indonézia ne’ebá. “Liuliu koñesimentu iha Danau Toba”.
Enkuantu, kona-ba fundu ba atividade FamTrip ne’e, nia haktuir katak ladún hatene. “Tanba akomodasi kona-ba viajen ida ne’e, responsabilidade husi Ministériu Turizmu Indonézia nian, kona-ba tiket, otel no mós osan viajen nian”.
Iha fatin hanesan, Jornalista INDEPENDENTE, Pedro Alves Martins agradese tebes ba KBRI tanba bele fó oportunidade ba jornalista sira inklui nia hodi bele ba vizita fatin sira iha ne’ebá atu hasa’e tan koñesimentu oinsá halo kobertura iha rai li’ur nian.
“Bainhira fila fali mai Timór bele sai mós hanesan matéria ida di’ak ida, bele mós iha hanoin atu dezenvolve iha área setór turizmu nian,” dehan jornalista Pedro Alves ne’ebé hanesan mós estudante Komunikasaun Sosiál, UNTL ne’e.
Nune’e mós, Jornalista STL (Suara Timor-Lorosa’e), Jacinta Sequeira dehan katak liuhusi programa kooperasaun entre KBRI ho Timor-Leste, ne’ebé ho instituisaun mídia sira iha Timor-Leste, sente kontente tanba bele hetan oportunidade ida ne’e, hodi bele ba vizita. “Maske tempu limitadu maibé ha’u sente kontente, bele ba vizita fatin turizmu iha Indonézia nian”.
Jornalista Jacinta, iha biban ne’e, agradese mós ba instituisaun ne’ebé fó ona fiar ba nia hodi bele ba vizita fatin turizmu nian, hamutuk ho kolega mídia sira seluk. “Depois fila fali mai Timor bele fahe tutan informasaun sira ne’ebé hetan ona ba kolega sira seluk liuliu kona-ba área turizmu nian, komparasaun Timor-Leste ho Indonézia,” dehan jornalista timoroan ne’e.
Jornalista timoroan na’in 10 ne’ebé mak envolve iha vizita turístika ne’e mane na’in sia no feto na’in ida. Profisionál komunikasaun sosiál sira ne’e, tuir ajenda ne’ebé mak iha sei fila mai Timor-Leste iha loron 16, semana.
Jornalista : Nelia Fernandes
Editór : Rafy Belo
