DILI, 13 setembru 2019 (TATOLI)- Komandante Komandu Operasionál Nasionál (KKON), Superintendente Xefe, Pedro Belo., informa, Komandu PNTL too agora seidauk simu informasaun no keixa ruma husi públiku kona-ba informasaun ne’ebé espalla iha rede sosiál katak, oknum polisia halo torturasaun ba membru grupu ilegál sira iha Postu Administrativu Atabae, Munisipiu Bobonaro no Munisípiu Covalima.
Pedro Belo halo alerta ba públiku sira karik sai vítima ka hetan baku husi oknum Unidade Polisia Fronteira (UPF) tenke hato’o keixa ba Komandu PNTL no Organizasaun Naun Govermentál ka Provedoria Direitu Umanu no Justisa (PDHJ) hodi komandu foti medida.
Pedro dehan, bainhira vítima ka família vizita sira posting de’it video no fotografia iha média sosiál hodi akuza polisia halo agresaun fíziku ba sira sei la rezolve problema.
“Ha’u husu ba públiku atu aprezenta provas no faktu mai polisia, la’ós posting fali foto ou video iha média sosiál (Facebook) tun sa’e. Se mak sai vítima iha momentu ne’ebá tenke mai hato’o keixa para polisia bele haree,” alerta Pedro Belo, ohin, hodi responde jornalista iha Komandu Jerál PNTL, Caicoli, Dili.
Pedro Belo dehan, agora daudaun ekipa PNTL halo hela operasaun ba grupu ilegál iha Timor-Leste tomak inklui iha fronteira Covalima, Oe-Cusse too Motain no Dili hodi buka tuir grupu ilegál sira ne’ebé hala’o viajen sai husi Timor-Leste atu ba hasa’e sabuk iha Atambua no Kupang-Indonézia.
“Agora daudaun polisia halo hela operasaun nafatin iha fatin hotu-hotu atu haree grupu ilegál sira ne’ebé halo hela sira nia atividade treinu parte fronteira tama sai balun la iha dokumentu no halo fali konfrontu ho ami nia membru fronteira tanba sira tama mai ho ekipa boot sira mós tuda fali nia membru sira,” nia hatete.
Pedro dehan, grupu ilegál sira ne’e tuda fali membru PNTL sira, tanba ne’e membru PNTL uza maneira oin-oin hodi asegura seguransa para bele kaptura membru grupu ilegál sira ne’e.
Jornalista : Eugénio Pereira
Editór : Francisco Simões
