DILI, 17 setembru 2019 (TATOLI) – Organizasaun Nasaun Unida (ONU) lamenta tebes ho desizaun Parlamentu Nasionál (PN) ne’ebé la autoriza Xefe Estadu, Francisco Guterres Lú Olo atu partisipa iha reuniaun Asembleia Jerál Nasaun Unida ba dala 74 iha Nova Iorke, fulan ne’e.
Reprezentante ONU iha Timor-Leste, Roy Trivedy espresa lamentasaun ne’e iha Palásiu Prezidente Nicolau Lobato, Baieru Pité, ohin, hafoin hasoru malu ho Xefe Estadu, Francisco Guterres Lú Olo.
Nia hateten desizaun ne’ebé PN halo hodi la aprova pedidu Prezidente Repúblika (PR) nian ne’e lori tristeza boot ho ninia impaktu boot ba dezenvolvimentu Timor-Leste, tanba laiha reprezentante altu nível durante reuniaun sira ne’e.
Lee mós: PN La Autoriza PR Lú Olo Ba Nova Iorke
“Ha’u espera katak PN ho Prezidente Repúblika bele rezolve lalais diferensa entre sira, nune’e Timor-Leste bele iha reprezentasaun iha nível apropriadu tanba enkontru sira hanesan ne’e importante tebe-tebes ba dezenvolvimentu nasaun nian”, Troy espera.
Maski ho situasaun ne’e, Troy reinteira katak ONU sei prontu nafatin atu asisti TL liuhusi dezenvolvimentu ba rai ida ne’e.
Iha soru-mutu ho Prezidente Repúblika, nia informa kona-ba Reuniaun Asembleia Jerál iha fulan ida ne’e no empatiza importánsia hosi reuniaun sira ne’ebé sei akontese iha fulan ida ne’e nia laran iha Nova Iorke.
Nia eplika, reuniaun sira ne’e balun sei trata asuntu importante sira hanesan mudansa klimátika, finansa, dezenvolvimentu, saúde primária ho objetivu dezenvolvimentu sustentável.
Antes ne’e, Prezidente Repúblika deklara prontu atu partisipa iha Asembleia Jerál ONU ba dala-74 iha Nova Iorke, iha ne’ebé Xefe Estadu hosi nasaun 164 sei partisipa.
Jurnalista: Cipriano Colo
Editór: Xisto Freitas
