Thai PBS ho CI Buka Meiu Kombate Hoax no Diskursu Ódiu
BANGKOK, 23 setembru 2019 (TATOLI)—Thai Public Broadcasting Service (Thai PBS) ho Konsellu Imprensa (CI-sigla Portugés) Timor-Leste halo komunikasaun atu oinsá mak parte rua luta kombate hoax (informasaun falsu) ho diskursu ódiu (hate speech) ne’ebé livremente espalla iha rede sosiál.
Liuhusi soru-mutuk entre Prezidente CI, Virgílio da Silva Guterres ho dirijente sira Thai PBS nian ne’ebé hala’o iha salaun Thai PBS, Bangkok, ohin, parte Thai PBS nian aprezenta mós sira-nia preokupasaun hanesan mós rai seluk nia preokupasaun kona-ba informasaun falsu ho diskursu ódiu ne’ebé livremente espalla iha mídia sosiál, ohin loron.
“Ha’u mós hateten ba Thai PBS sira katak, ida ne’e sai mós preokupasaun iha Timor-Leste. Tanba ita hatene iha periúdu kampaña polítika no eleisaun jerál, ita haree katak hoax ho diskursu ódiu la’o no kontinua la’o hela iha Timor to’o agora,” hateten Prezidente CI, Virgílio da Silva Guterres, hodi responde jornalista sira hafoin soru-mutuk ho dirijente sira Thai PBS nian.
Liuhusi diskusaun ne’e Thai PBS hatudu nia prontidaun atu koopera ho CI atu parte rua enfrenta situasaun ne’e no sujere atu parte rua halo semináriu hamutuk iha Dili atu fórmula konseitu mútua ida, hamutuk kombate problema boot hoax ho diskursu ódiu.
Asuntu seluk mak Thai PBS aprezenta ne’e mak digital disruption ne’ebé iha relasaun ho plataforma dijitál online ne’ebé mosu bar-barak hodi fó ameasa ba mídia tradisionál sira (mídia imprime). Tanba ne’e, Thai PBS ho CI buka kolabora malu atu oinsá enkoraja mídia tradisionál bele eziste iha situasaun sira ne’e.
Jornalista: Francisco Simões
Editór: Xisto Freitas
