DILI, 24 setembru 2019 (TATOLI) – Parlamentu Nasionál (PN) autoriza Deputada Bankada Partidu Demokrátiku (PD), Elvina Sousa hodi sai sasin iha Tribunál Distritál Dili (TDD).
Liuhosi sesaun plenária iha tersa ne’e, PN autoriza ho votu a-favór 38, kontra 1 no abstensaun 2.
Vise-Prezidente Komisaun A ne’ebé trata asuntu Konstitusionál no Justisa, Deputadu Francisco de Vasconcelos, haktuir Tribunál haruka ona karta hodi husu Parlamentu nia autorizasaun.
“Deputada ne’e ba sai sasin iha audiénsia julgamentu loron 11 outubru 2019, tanba ne’e mak Komisaun A bolu ona deputada no deputada prontu sai sasin ba iha Tribunál”, hateten Deputadu Vasconcelos.
TDD haruka pedidu ba Parlamentu ho NUC 008/17 no iha pedidu ne’e husu ba Deputada Elvina Sousa hodi presta deklarasaun hanesan sasin iha loron 11 outubru 2019, tuku 09.00 dadersan.
Prezidente Parlamentu Nasionál (PPN), Arão Noé de Jesus da Costa Amaral, hateten deputada Bankada PD ne’e iha opsaun rua hodi hatán ba Tribunál.
“Opsaun ne’ebé Deputada hakarak hili eskrita ka la’e kabe ba Deputada komunika mai Parlamentu. Karik hakarak eskrita, ha’u bele manda fali karta ba Tribunál”, informa PPN.
Deputada Elvina Sousa, haktuir kazu ne’e akontese iha Fatisi hodi rezulta nia kolega di’ak, Emília Muzaco hakotu-iis no kondutór mós kanek todan.
“La’ós hasai imunidade maibé fó autorizasaun hodi ha’u atu sai sasin ba asidente karreta baku-fila ne’ebé akontese iha Fatisi. Ha’u mós hanesan vítima iha asidente ne’e”, nia akresenta.
Maski nune’e, nia parte prontu koopera ho justisa hodi ninia kolega ne’ebé lakon vida bele hetan justisa ne’ebé justu.
“Kazu ne’e la sala akontese iha 2016, hafoin ami fila hosi konsolidasaun Partidu Demokrátiku nian iha Fatisi”, nia subliña.
Jornalista: Evaristo Soares Martins
Editór: Xisto Freitas
