DILI, 24 setembru 2019 (TATOLI) – Sentru Formasaun Judisiál seidauk loke vaga, ho razaun sei halo hela revizaun ba dekretu lei kona ba sentru formasaun nian.
Notísia Relevante : Judisiáriu Sira Tenke Domina Lian Portugés
“Sentru formasaun judisiál haruka ona ba Ministériu Justisa no sei lori ba Konsellu Ministru aprova tiha mak Tribunal halo anúnsiu hodi loke fali vaga ba formasaun sétimu kursu nian,” informa Diretór Sentru Formasaun Judisiál, Antonino Gonçalves, ohin, ba Ajénsia TATOLI, iha Sentru Formasaun Judisiál, Caicoli, Dili.
Nia hatutan, kuandu loke vaga ba formandu mak sei aposta kualidade intermus tenke hatene lingua Portuguesa, tuir formasaun ne’ebé mak rigorozu hodi bele hetan valor ne’ebé di’ak atu hadi’a kualidade justisa.
Durante nee sai preokupasaun boot ba povu ho entidade Estadu sira mak juis ho prokuradór no defensór la dun kualidade, tanba ne’e, sentru formasaun judisiál iha ona kometimentu atu prepara aan didi’ak atu hadia di’ak liu tan.
Meius ida hadi’a, tuir Antonino Gonçalves, juis, prokuradór no defensór mak agora daudaun tuir hela formasaun komplementár no revizaun material balun iha sentru formasaun hodi aumenta sira nia koñesimentu di’ak liu tan. Ho material sira ne’ebé mak husu mak hanesan kona lei kódigu sivíl, lei krime no area sivíl nian ho formasaun portugés.
Jornalista : Domingos Piedade Freitas
Editór : Francisco Simões
