DILI, 24 setembru 2019 (TATOLI) – Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo, informa Primeiru-Ministru (PM), Taur Matan Ruak, fó ona orientasaun ba MTK hodi kansela obra terminál Tasitolu tanba fatin refere konsidera nu’udar zona protejida no sítiu istóriku tanba tuir planu Governu iha hanoin atu halo prezervasaun.
“Loos duni, Primeiru-Ministru orienta ona fatin ne’ebá ne’e fatin istóriku no protejidu, fatin ne’ebá ne’e labele tau terminál, kuandu tau terminál ne’e estraga ona fatin istóriku. Tanba ne’e, Primeiru-Ministru la konkorda atu halo terminál”, Diretór Deonísio ba Tatoli iha Kaikoli, ohin.
Tanba ne’e, horiseik, nia parte simu ona orientasaun husi Ministru Transporte no Komunikasaun, José Agostinho, atu haree filafali fatin foun hodi konstrui terminál pasajeiru.
“Ha’u horiseik simu ona orientasaun husi ministru hodi hateten katak ha’u tenke haree fali fatin foun ruma hodi konstrui fatin ba terminál Tasitolu no fatin ne’e maka iha Tibar ne’ebá”, haktuir Diretór Jerál ne’e.
Nia dehan terminál ne’e tenke sai husi sidade laran, labele iha área Tasitolu nian tanba sei estraga imajen área protejida ne’ebé Governu planeia atu proteje no prezerva, nune’e nia parte sei bá halo koordenasaun ba kestaun ne’e.
“Maibé, antes ha’u atu bá koordena iha ne’ebá, ha’u tenke koordena uluk ho Sekretáriu Estadu Terras no Propriedade (SETP) hodi haree kestaun ne’e”, tenik Deonísio.
Tanba tuir mapeamentu SETP nian iha ne’ebá (Tibar), fatin mamuk iha, tanba ne’e koordena ho sira, depois maka ho xefe suku Tibar.
Hatán kona-ba obra terminál Tasitolu nian atinje ona 80% maka la uza, Diretór Jerál ne’e hatete, hanesan ezekutór kuandu orientasaun husi PM ba ministru no tun mai, diretór sira ne’e kumpre de’it.
“Ami hanesan ezekutór, ezekuta tuir orientasaun ne’ebé PM haruka ba ministru no ministru orienta mai ami dehan kansela, entaun ita kansela”, afirma.
Nia dehan mezmu osan Estadu nian gasta ona ba konstrusaun terminál, maibé hanesan de’it tanba forsa sira maka uza fali mós laiha problema tanba ne’e Estadu hotu.
Sobre kompañia ne’ebé halo obra ne’e, Mar Vermelha, Deonísio hateten ministériu sei hamoris fali nia kontratu tanba daudaun ne’e mate, nune’e kuandu relatóriu ne’ebé MTK haruka ba Ajénsia Dezenvolvimentu Nasionál (AND) verifika tiha katak projetu ne’e atinje ona porsentu hanesan ne’e para hodi selu tuir persentajen ne’ebé kompañia halo ona.
“Maibé atu kansela ne’e, administrativamente ita tenke halo oinsá maka kompañia halo servisu ne’e tenke simu nian direitu, signifika ita tenke selu tanba nia halo depende ba avaliasaun husi AND sira”, dehan Deonísio.
Obra ba konstrusaun terminál Tasitolu ne’e mai husi Konsellu Administrasaun Fundu Infraestrutura ho montante inisiál $346. 340,27 no pagamentu obra ne’e hela de’it dólar rihun 200. Obra ne’e hahú iha 2014.
Notísia relevante : Ministru José Agostinho Promete Sei Rezolve Terminál Tasitolu
Jornalista : Natalino Costa
Editora : Maria Auxiliadora
