Preparasaun ba Prezidénsia ASEAN 2029, Governu aprova rejime espesiál ba obra públika

DILI, 28 Outubru 2026 (TATOLI) – Governu aprova Rejime Espesiál Aprovizionamentu ba Konstrusaun Infraestrutura nu’udar preparasaun ida ba Timor-Leste asume Prezidénsia ASEAN iha 2029.

Sekretáriu Estadu Komunikasaun Sosiál, Expedito Dias Ximenes, hatete projetu dekretu-lei ne’e aprezenta husi Ministru Obra Públika, Samuel Marçal, ho objetivu mak atu hadi’a asesibilidade no reabilitasaun sidade Dili, iha ámbitu preparasaun eventu sira ne’ebé relasiona ho Prezidénsia Timor-Leste nian ba ASEAN.

Nia dehan diploma ne’e estabelese rejime aprovizionamentu espesiál ida hodi simplifika prosedimentu sira ne’ebé aplika ba ezekusaun projetu prioritáriu sira hodi hadi’a asesibilidade no reabilitasaun sidade Dili, atu garante ninia finalizasaun tuir tempu loloos ba eventu sira ne’ebé relasiona ho Prezidénsia Timor-Leste nian ba ASEAN, ne’ebé tuir planu sei hahú iha 2029.

Nia esplika katak infraestrutura sira ne’ebé tama iha rejime ne’e inklui seksaun neen husi estrada sira ho dalan sira iha sidade Dili, intervensaun iha estrada sira, dalan ba ema-la’o-ain no espasu públiku sira, nune’e mós substituisaun husi sistema eletrisidade públika iha rai-leten ho sistema rai-okos, no instalasaun ka pré-instalasaun infraestrutura públika ba saneamentu, abastesimentu bee-moos no telekomunikasaun.

“Objetivu mak atu to’o iha tinan 2029, bainhira Timor-Leste asume responsabilidade hanesan Prezidénsia ASEAN, ita-nia kapitál Dili bele aprezenta imajen ne’ebé di’ak no infraestrutura ne’ebé adekuada ba vizitante no delegasaun internasionál sira ne’ebé sei mai vizita Timor-Leste”, nia dehan.

Expedito salienta katak ba ezekusaun projetu hirak-ne’e nian, diploma ne’e permite uza prosedimentu solisitasaun kotasaun ka ajuste diretu, la haree ba valór kontratu nian, sein sees husi prinsípiu no regra sira seluk ne’ebé aplikavel ba aprovizionamentu públiku no mós ezekusaun despeza públika nian.

Implementasaun projetu sira ne’e kabe ba Ministériu Obra Públika no empreza públika sira ne’ebé iha nia tutela, ho Komisaun Nasionál Aprovizionamentu, I.P., ne’ebé responsavel ba hala’o prosedimentu aprovizionamentu nian.

Nune’e, ba Ajénsia Dezenvolvimentu Nasionál, I.P., mantein ninia kompeténsia ba verifikasaun téknika no finanseira no kompeténsia sira seluk ne’ebé prevee ona iha lejizlasaun aplikavel.

Nia dehan medida ida-ne’e ho objetivu atu garante ezekusaun atempada (tuir tempu loloos) husi atividade sira ne’ebé nesesáriu hodi prepara sidade Dili ba eventu sira ne’ebé asosiadu ho Prezidénsia ASEAN nian, hodi kontribui mós ba hadi’a sirkulasaun rodoviária no ema-la’o-ain, espasu urbanu, no mós infraestruturas públika ne’ebé sai parte husi obra sira ne’e.

Notísia relevante: OJE 2027 aumenta alokasaun ba eleisaun no preparasaun Prezidénsia ASEAN 2029

Jornalista: Arminda Fonseca 

Editora: Maria Auxiliadora