DILI, 1 Outubru 2019 (TATOLI) – Prezidente Tribunál Rekursu (PTR), Deolindo dos Santos, hateten Xefe Estadu, Francisco Guterres Lú Olo husu nafatin ba parte Tribunál atu labele iha koor polítika, maibé mantein kumpre lei ne’ebé iha.
“Prezidente Republika husu Tribunál labele iha koor polítika no labele iha hanoin katak maioria no minoria, maibé tenke kumpre lei ne’ebé iha atu asegura Estadu Demokrátiku ida ne’e”, katak Deolindo hafoin enkontru ho Prezidente Repúblika, Francisco Guterres Lú Olo iha Palásiu Prezidente Nicolau Lobato, Bairru Pité, ohin.
Nia haktuir, iha enkontru ne’e mós, Prezidente Repúblika husu Tribunál atu serbisu di’ak liután nune’e bele kria justisa ne’ebé di’ak ba povu iha Timor laran tomak.
“Xefe Estadu husu ne’e tanba Tribunál mak bele asegura prinsípiu konstituisaun, ne’ebé mak hateten katak Timor ne’e Estadu Direitu Demokrátiku”, nia informa.
Jornalista: Cipriano Colo
Editór: Xisto Freitas
