iklan

EDUKASAUN, BOBONARO, MUNISÍPIU

Anin Sobu Eskola Bázika Filiál Aiasa Balibo

Anin Sobu Eskola Bázika Filiál Aiasa Balibo

Eskola Bázika Filiál Aiasa, Sentru Leohitu, Postu Administrativu Balibo, Munisípiu Bobonaro, ne'ebé anin sobu, kuarta (02/10/2019). Imajen/Espesiál husi Profesór Alexandrino Vicente.

DILI, 02 outubru 2019 (TATOLI)- Anin boot ne’ebé akontese, ohin, iha Munisípiu Bobonaro, destroi  (sobu) infraestrutura Eskola Bázika Filiál Aiasa, Sentru Leohitu, Postu Administrativu  Balibo, Munisípiu Bobonaro.

Anin sobu Eskola Bázika Filiál Aiasa, Sentru Leohitu, Postu Administrativu Balibo, Munisípiu Bobonaro.

Profesór EBF Aiasa, Alexandrino Vicente, informa ba  Ajénsia TATOLI via komunikasaun rede sosiál Facebook, katak, dezastre ne’e akontese iha tuku 12:24 Otl, bainhira estudante sira simu hela materia aprendizajen iha aula.

“Anin boot ne’e konsege sobu totál uma eskola Bázika Aiasa ho sala tolu  ne’ebé  durante ne’e akumula  ona estudante husi klase ida to’o klase neen,” informa Alexandrino Vicente.

Husi sorin seluk, Francisco dos Santos, nu’udar aman husi estudante EBF Aiasa, preokupa ho akontesimentu ne’e tanba afeta ba prosesu aprendizajen nia oan sira nian ne’ebé hein de’it ona fulan atu enfrenta ezame nasionál.

“Husu ba Governu liuhosi Ministériu Edukasaun Munisípiu no Nasionál atu fó atensaun ba situasaun ne’e, tanba ezame nasionál besik daudaun no tempu udan mós besik daudaun ona,” hateten Francisco dos Santos via telefónika.

Alende sobu uma eskola, kazu hanesan akontese sobu mós uma komunidade rua iha Aldeia Aiasa, Suku Leohitu, Postu Administrativu Balibo, Munisípiu Bobonaro.

Jornalista : Agapito dos Santos

Editór       : Francisco Simões

iklan
iklan

Leave a Reply

iklan
error: Content is protected !!