DILI, 2 outubru 2019 (TATOLI) – Prezidente Tribunál Rekursu (TR), Deolindo dos Santos, kinta ne’e, hasoru malu ho Primeiru-Ministru, Taur Matan Ruak, hodi husu Governu aumenta orsamentu ba Tribunál nune’e bele ajuda órgaun ne’e nia serbisu di’ak liután.
Deolindo hateten serbisu hotu la’o di’ak presiza orsamentu sufisiente nune’e bele dezenvolve serbisu hotu la’o di’ak.
“Ha’u ho Primeiru-Ministru ko’alia oinsá mak bele haree orsamentu Tribunál nian sufisiente atu ita bele dezenvolve Tribunál ne’e di’ak liután ho forma kria kondisaun ba juiz sira,” tenik Deolindo iha Paláçio do Governo.
Nia dehan, planu Tribunál nian iha tinan 2020 sei harii tan edifísiu Tribunál sira ho kondisaun ne’ebé di’ak.
“Trubunál atu harii ne’e mak Dili rasik, Baucau, Suai no Oé-Cusse maibé prioridade liu atu harii uluk ne’e mak Baucau, Suai no Dili tanba ita haree kondisaun iha ne’ebá kloot loos. Entaun, tinan oin, ita presiza halo duni,” katak Deolindo.
Aleinde ne’e, nia hatutan, loke mós rezidénsia ba juiz sira iha Tribunál Suai, Baucau no Oé-Cusse tanba maioria juiz ne’ebé serbisu iha Tribunál hirak ne’e hosi Dili mak ba hala’o serbisu.
“Ho nune’e mak ita tenke halo rezidénsia didi’ak para juiz sira bele ba hela iha ne’ebá hodi hala’o serbisu ne’ebé di’ak liubá ema hotu,” Deolindo haklaken.
Nia subliña, tinan 2020, Tribunál Rekursu hato’o pedidu adisionál hamutuk millaun $5 resin atu bele realiza planu ne’ebé planeia ona. Antes ne’e, orsamentu jerál Estadu 2019 aloka ba Tribunál Rekursu hamutuk millaun $3, 440.
Jornalista: Hortençio Sanchez
Editór: Xisto Freitas
