DILI, 4 outubru 2019 (TATOLI)-Eskola Ensinu Sekundáriu Jerál (ESG) 12 Novembru Becora aprezenta ona lista ba Ministériu Edukasaun, Juventude no Desportu (MEJD) ho totál estudante na´in 421 hodi partisipa iha Ezame Nasionál maibé semana kotuk menus tiha estudante tanba hakotu ona iis. Estudante ne´e ho naran Osoriu Nuno, husi Rejiaun Autonoma Espesiál, Oe-cusse-Ambeno (RAEOA).
“Parte eskola lakon ona ninia estudante diak ida ne’ebé durante ne’e hatudu ninia kapasidade inteletualidade iha kualker matéria sira. Osoriu Nuno estudante ida iha pottensia bo’ot ba futuru rai ida ne´e nian tanba kapsidade ne’ebé nia iha hatudu iha eskola ne’e. Maibé, ninia jornada iha mundu ne’e termina iha semana kotuk,” hateten Gabinete Apoiu Tékniku (GAT), ESG 12 Novembro Becora, Mario Tomas da Conceição ba Ajénsia TATOLI iha eskola 12 novembro Becora, Sesta (04/10/2019).
GAT Mario Tomas haktuir estudante Osorio Nuno hakotu ninia iis iha Ospital Nasional Guido Valadares (HNGV), iha semana kotuk, hafoin baixa durante loron haat. “Ninia moras ne’e la kle´ur ida uainhira nia husu lisensa ba hakoi ninia avó iha Oecuse depois fila fali mai nia mós moras. Loron haat de’it toba iha HNGV ikus mai nia hakotu iis,” tenik GAT ne´e.
Autoridade eskola 12 novembro ne’e esplika katak ho Osorio nia mate agora hela de’it estudante finalista hamutuk 420 mak sei tuir Ezame Nasionál iha loron 14 to’o 16 outubru 2019. Tuir Mario Tomas katak estudante 420 ne’e kompostu husi siénsia naturál 221 no siénsia sosiál 200. Portantu, prosesu ne’ebé mak parte eskola halo mak nafatin akompaña estudante sira atu nune’e sira bele prepara aan nafatin.
Maibé kona-ba regras hotu, GAT, Mario Tomas hateten katak buat hotu mai husi MEJD, parte eskola hein de’it oinsá atu ezekuta tanba dirasaun kompotente antes ne’e halo ona sensibilizasaun ba eskola hotu inklui 12 novembru rasik.“Entaun parte eskola la dúvida ho estudante sira ninia kompriensaun ba ezame nasionál iha semana oin,” nia haktuir.
Jornalista : Tomé Amado
Editór : Rafy Belo
