DILI, 09 outubru 2019 (TATOLI)-Diretór Eskola Nobel da Paz, Pedro Nunes Menezes apresia nia estudante sira tanba tinan tolu tutuir malu hetan terseiru lugar iha ezame nasionál.
“Ha’u apresia ha’u-nia profesór sira tanba eskola ne’e hetan terseiru lugar tinan tolu tutuir malu ne’e tanba profesór sira-nia dedikasaun,” tenik Diretór Pedro Nunes ba Ajénsia TATOLI iha ninia knaar fatin, Quintal boot, kuarta (09/10/2019).
Diretór Pedro dehan kuandu Ministério Edukasaun anunsia rezultadu ezame nasionál iha 2016 ninia eskola ensinu báziku terseiru siklu hetan terseiru lugar. Tuir mai 2017-2018 esudante finalista ensinu sekundáriu hetan mós terseiru lugar.
“Ida ne’e orgullu boot ida ba ami hanesan fundasun no mós diretór eskola. Tan ne’e, ha’u hatene didi´ak kapasidade profesór sira nian. Signifika maneira ne’ebé mak ha’u ezije sira kumpre duni,” haktuir manorin na´in ne´e.
Tuir nia katak molok profesór ida atu hanoin nia sei ba peskiza. Signifika, kada profesór iha ninia planu aulas ka lae. Kuandu planu ne’e konvense duni mak foin bele implementa, se lae tenke hadi´a.
Ne’e duni profesór sira iha idaidak ninia planu bazeia ba méritu. Iha profesór na´in tolu mak nivel edukasaun mestradu (S2) no sira seluk kuaze lisensiadu husi rai laran no mós rai li´ur. Nia informa maestrado na´in tolu ne’e feto rua, mane ida, sei kontinua hela sira nia estudu.
“Rekursu na’in tolu ne’e ida iha ICR na’in rua iha UNTL, ida direitu, ida seluk língua portugeza. Husi profesór na’in tolu ne’e rua iha ona esperiénsia hanorin 12 no 15 anos. Nu´udar diretór nafatin louva sira-nia kualifikasaun,” konklui Diretór Eskola Nobel da Paz ne´e.
Notísia relevante:Eskola Nobel da Paz Sei Harii Edifísiu Foun
Jornalista : Tomé Amado
Editór : Rafy Belo
