DILI, 09 outubru 2019 (TATOLI) – Estudante klase sétimu ano, Litania Davia Soares Reis (12), sai Prezidente Parlamentu Nasionál (PPN) durante minutu 45 nia laran.
Estudante hosi Aldeia Gerudo, Suku Soro, Postu Administrativu Ainaro Vila, Munisípiu Ainaro, espresa nia sentimentu tanba hetan fiar no nia mós agradese ba atuál PPN, Arão Noé de Jesus da Costa Amaral.
“Sente kontente tanba bele sai hanesan Prezidente Parlamentu Nasionál durante minutu balun. Obrigadu mós señor Arão Noé”, dehan Litania Soares iha Parlamentu Nasionál (PN), kuarta ne’e.
Nia hatutan: “Ha’u hakarak feto sira asesu ba edukasaun ho másimu hanesan mós ho mane sira tanba tempu uluk no agora la hanesan”.
Estudante ne’e iha mehi loron ruma bele lidera Ministériu Solidariedade Sosiál.
Programa ne’e realiza tanba kooperasaun entre Prezidénsia Parlamentu Nasionál no Plan International.
Iha fatin hanesan, Adjunta Plan International, Fátima Estrela Soares, hateten programa ne’e realiza tanba kampaña globál iha mundu tomak hamutuk nasaun 70.
“Iha nasaun seluk foti mós pozisaun Primeiru-Ministru, Prezidente Repúblika, Prezidente Parlamentu Nasionál, setór privadu balun no embaixadór sira hanesan mós iha Timor-Leste. Ne’e oinsá empodera labarik feto hahú kedas agora atu sira bele sai feto ida-ne’ebé kapasidade iha futuru”, dehan nia.
Jornalista: Evaristo Soares Martins
Editór: Xisto Freitas
