DILI, 9 outubru 2019 (TATOLI)–Provedoria Direitu Umanu no Justisa (PDHJ-sigla portugés) konvida Prezidente Parlamentu Nasionál (PPN) atu sai oradór ba semináriu nasionál kona-ba ema ho defisiénsia iha Timor-Leste.
“PDHJ konvida Prezidente Parlamentu Nasionál atu partisipa no partikulármente atu sai oradór ba semináriu nasionál ema ho defisiénsia,” Adjuntu Provedór Direitu Umanu no Justisa, Miguel Pereira de Carvalho ba jornalista sira iha Parlamentu Nasionál, kuarta ne’e.
Nia dehan, semináriu nasionál ne’e ho objetivu atu garante ema ho defisiénsia iha rai-laran.
Semináriu nasionál ne’e sei realiza iha 22 outubru iha ámbitu Konferénsia Annuál Fórum Instituisaun Direitu Umanu Sudeste Aziátiku mak entrega ba nasaun Indonézia, Filipina, Malázia, Tailándia no Myanmar inklui Timor-Leste.
Lee mós: PDHJ Sai Uma Na’in Ba Enkontru Sub-Rejionál Sudeste Aziátiku Direitus Umanus
“Tanba ne’e mak PDHJ presiza prezensa Prezidente Parlamentu Nasionál, Arão Noé de Jesus da Costa Amaral tanba PDHJ garante dezenvolvimentu iha rai ne’e iha inkluzividade no igualdade ba ema hotu-hotu,” Miguel esplika.
Maski nune’e, nia subliña, Timor-Leste seidauk ratifika konvensaun ba ema ho defisiente nian.
“Ha’u hanoin PDHJ kongratula Parlamentu Nasionál tanba iha semana kotuk hasai ona rezolusaun ida hodi fó ba Governu atu bele foti medida nesesáriu hodi ratifika Konvensaun Internasionál ba ema ho defisiénsia”, Miguel haktuir.
Jornalista: Evaristo Soares Martins
Editór: Xisto Freitas
