DILI, 10 outubru 2019 (TATOLI) – Uma Mahon Lautém infrenta difikuldade ba transporte no akompañamentu ba rekoperasaun vítima sira.
“Difikuldade ne’ebé hasoru mak falta transporte. Oras ne’e, kareta iha ida de’it”, Diretór Sentru Solidariedade Sosiál Munisípiu Lautém, Paulo da Silva Pinto, hato’o difikuldade ne’e ba espoza Prezidente Repúblika (PR), Cidália Nobre Lopez Mouzinho Guterres bainhira hala’o vizita ba Uma Mahon ne’e iha Munisípiu Lautém, ohin.
Nia hateten, Sentru Solidariedade Sosiál halo koordenasaun ho ONG Luzeira hodi tau-matan ba vítima violénsia seksuál no labarik sira.
Nia esplika katak papél hosi Sentru Solidariedade Sosiál atu halo asesmentu hodi halo asisténsia sosiál ba kazu hirak hanesan temi ona, no halo relatóriu ba Ministériu Públiku inklui superviziona serbisu Uma Mahon.
Nia mós relata katak sentru ne’e iha funsionáriu hamutuk na’in 16. Na’in lima destaka ba iha postu administrativu lima no restu iha hela sentru inklui psikólogu ida atu atende kazu sira.
“Kada tinan Uma Mahon ne’e simu vítima kuaze rua nulu no oras ne’e daudaun sei iha vítima na’in tolu mak sei hetan akompañamentu iha Uma Mahon refere”, nia haktuir.
Paulo informa katak kazu hirak ne’e rejistu hotu ona iha Ministériu Públiku (MP) hodi hein oráriu fiksu hosi Trinunál atu halo julgamentu no parte Uma Mahon mós akompaña nafatin no ezije ba MP atu aselera prosesu.
Iha fatin hanesan, espoza Prezidente Repúblika, Cidália Nobre Lopez Mouzinho Guterres hateten, durante vizita Uma Mahon ne’e, haree no rona preokupasaun barak kona-ba menus fasilidade no akompañamentu ba vítima sira.
Cidália dehan, iha Uma Mahon hotu-hotu ne’ebé nia vizita sempre iha problema hanesan, liliu kona-ba apoiu ba vítima sira.
Kona-ba preokupasaun ne’e, espoza Prezidente haklaken katak hosi Gabinete Espoza nian iha de’it orsamentu natoon atu fó apoiu ba de’it nesesidade sira ne’ebé presiza duni.
Liután ida-ne’e, nia dehan, atu halo buat boot no nesesidade sira seluk ne’e kompeténsia órgaun kompetente hanesan Governu no hein katak Governu bele hala’o duni nia serbisu atu responde preokupasaun sira maski neneik maibé beibeik.
Nu’udar inan nasaun, Cidália mós husik hela mensajen ida ba públiku katak, hanesan timoroan, bainhira atu halo buat ruma tenke hanoin didi’ak tanba asaun hotu-hotu iha ninia konsekuénsia.
Tuir nia, asaun sira ne’e mak rezulta ka hamosu Uma Mahon barak inklui Uma Mahon ne’ebé ohin hetan vizita.
Iha biban ne’e, Vise Ministra Solidariedade Sosiál no Inkluzaun, Signi Verdial hateten, iha tinan 2020, sei haree kona-ba orsamentu ne’ebé prevee ba Instituisaun Solidariedade Sosiál, tanba iha tinan kotuk liubá prevee millaun $2, liliu iha tinan rua tutuir malu Governu moris de’it ho orsamentu duo-désimu ne’ebé ho valór millaun $1.5 mak hamosu difikuldade hirak ne’e.
“Fatór sira ne’e mak kontribui ba difikuldade sira ne’ebé iha”, dehan Signi hafoin akompaña espoza PR vizita Uma Mahon Lautém.
Vise Ministra mós hateten katak, atu responde no rekopera hikas preokupasaun hirak ne’e mak Ministériu sei prevee orsamentu millaun $2 ba tinan 2020 no iha esperansa katak sei rezolve duni.
Jornalista: Cipriano Colo
Editór: Xisto Freitas
