DILI, 11 outubru 2019 (TATOLI)-Ho onra tebes Abrilia Soares, ohin loron tomak, asume kna’ar hanesan Komisária Nasionál Direitu Labarik (KNDL).
Notísia Relevante : Zélia, Maubisse Oan Sai Provedora iha Oras Tolu Nia Laran
Aileu oan ho idade tinan 15, moris iha Fatisi Umalaun, Postu Administrativu Aileu vila iha loron 27 april 2004, asume knar hodi halo observasaun direita ba servisu hotu ne’ebé kabe ba kompeténsia KNDL hodi próteze labarik nia direitu.
Abrilia, oan feto husi Filomena Soares ho João Sarmento da Cruz, durante ne’e envolve-an ativu tebes iha programa vizaun foin sa’e no seluk tan. Nia iha mehi boot hakarak sai médiku no espesialista hodi bele servi diak liu tan povu rai doben Timor-Leste.
Notísia Relevante : Cristina Sai “Prezidente Repúblika” Durante Oras Ida
Daudaun ne’e, Abrilia hala’o nia estudu iha Eskola Sekundáriu Koléjiu São Pedro Aileu (Desímo ano) no iha komitmentu forte hakarak aprende no estuda atu bele atinje nia mehi sai médiku espesialista iha realidade.
“Ha’u kontente tebes sai komisária Nasionál Direitu Labarik durante loron tomak. Ha’u rekomenda ba KNDL no governu atu tau matan ba labrarik ki’ik sira ne’ebé kontinua la hetan atensaun ba edukasaun no atensaun mós ba labarik sira ne’ebé envolve an iha traballadór infantíl,” Abrilia hateten.
Notísia Relevante : Litania Davia Sai PPN Durante Minutu 45
Nia mós husu atu programa hanesan ne’e ba oin atu nune’e promove labarik hanesan jerasaun foun nasaun nian hodi hetan esperiénsia no sai bukae iha nia vida moris.
Komisária Nasionál Direitu Labarik sesante Dinorah Granadeiro fó benvindu no agradese ba Komisária Abrilia asume kna’ar hodi hala’o servisu KNDL nian durante loron tomak.
Iha soru-mutu ho kargu xefia KNDL ho parseiru dezenvolvimentu Plan Internasionál ne’ebé realiza programa ne’e, Abrilia Soares diskute kona-ba labarik feto iha igualdade no direitu universal labarik nian.
Jornalista : Nelson de Sousa
Editór : Francisco Simões
