DILI, 11 outubru 2019 (TATOLI)—Hanesan fitun sira be tabele no lakan nabilan iha lalehan nia sanak be aas, fitun sira kompete malu atu fitun ida ne’ebé lakan ho roman boot no lakan ho nia roman ki´ik tebes.
Atu hili fitun sira be lakan ho nia roman boot, liuhusi audisaun Dangdut Academy Asia-5 ne’ebé hala’o iha Timor-Leste iha loron 17 Agostu 2019 liubá, ne’ebé kompete husi konkorrente hamutuk ema-na´in 50 resin, ohin, na’in ba brand D’Academy Asia 5, formalmente fó sai desizaun hodi hili kontestante D’Academy Asia 5 ne’ebé reprezenta Timor-Leste hanesan “fitun” hodi kompete iha DAA-5 iha Jakarta-Indonézia.
“Hanesan na’in ba programa ba brand D’Academy Asia, mak tuir mai ha’u sei fó sai desizaun ba naran kontestante D’Academy Asia 5 ne’ebé mak reprezenta Timor-Leste mak hanesan; Ivan C. Araújo do Corimo de Sai (Ivan DE Sai), Jeciliana Auxiliadora Lopes de Araujo (Jessy Lopez), Jerico Aamaral de Jesus (Jery), Jivalicia D. Jesus R. Verdial (Ji Verdial) no Jose Borges (Jebor),” dehan Koordenadór Dangdut Academy Asia-5 (DAA-5) Golden Memories Asia TL, Jerente ETO+, Edmundo Freitas Lopes, hodi reprezenta PT. Indosiar Visual Mandiri nia naran, hato’o ba Ajénsia TATOLI liuhusi entrevista via rede sosiál (WA), sesta (11/10/2019).
Kontestante DAA-5 ne’ebé eleitu ona, nia hatutan, sira hirak ne’e tenke iha ona Jakarta-Indonézia iha Segunda (14 Outubru 2019) oin atu tuir konferensia da imprensa iha loron Sesta (18 Outubru 2019) nomós tuir atividade lubun no tuir treinamentu.
Tuir planu, nia informa, programa LIVE On Air D’Academy Asia 5 sei hahú iha loron Segunda (21 Outubru 2019) no sei ramata iha loron Domingu (29 Dezembru 2019). Iha ne’eba, sira sei kompete ho kontestante sira seluk husi nasaun Malazia, Singapura, Thailandia, Brunei Darusalam, Filipina no Indonézia
Tanba ne’e, nu’udar koordenadór iha Timor-Leste, nia hato’o parabens ba kontestante na’in lima ne’ebé eleitu, Ivan C. Araujo do Corimo de Sai (Ivan de Sai), Jeciliana Auxiliadora Lopes de Araujo (Jessy Lopez), Jerico Amaral de Jesus (Jery), Jivalicia D. Jesus R. Verdial (Ji Verdial) no Jose Borges (Jebor).
Hein katak, ita-boot na’in lima bele sai hanesan “fitun” ida hodi lori Timor-Leste nia naran nabilan no morin iha rejiaun Asia nia laran no ba mundu tomak lihusi D’Academy Asia 5 (DAA-5) 2019. Parabens!
Jornalista: Cancio Ximenes
Editór : Rafi Belo
