DILI, 11 outubru 2019 (TATOLI)-Ministra Edukasaun, Juventude no Desportu (MEJD), Dulce de Jesus Soares, fó sai ona katak estudante rihun 53,101 mak sei partisipa iha ezame nasionál ne´ebé sei realiza iha loron 14 outubru agora.
Dulce de Jesus Soares. Imajen/TATOLI
Tanba ne’e, distribuisaun pontus ka dokumentu ezame nasionál nia ba Munisípiu 12 inklui RAEOA (Rejiaun Autonoma Espesiál Oe-cusse, Ambeno) hahú ona iha sesta-feira, 11 outubru, atu nune’e bele distribui ba eskola sira iha territóriu Timór laran tomak hahú iha sábadu 12 outubru 2019.
Ministra Dulce de Jesus Soares hateten, tanba serimónia entrega materiál ezame nasionál nia realiza ona iha edifísiu Imprime Nasional de Timor-Leste. Ne’e duni Ministériu tenke organiza didi´ak atu nune’e distribuisaun ne’e bele to’o iha munisípiu sira hotu inklui RAEOA.
“Ohin dader ne’e RAEOA mak sai uluk tanba sira tenke liuhusi fronteira terrestre entaun ita tenki garante materiál pontu ezame násionál tenke hetan apoiu seguransa ida di´ak,” tenik MEJD, Dulce de Jesus Soares ba jornalista sira iha edifisiu INTL Colmera, (11/10/2019).
Governante ne´e akresenta, tempu distribuisaun ba pontu ezame nasionál ne´e loron rua de´it. Tinan ida ne’e mós prosesu distribuisaun tenke la´o diak hanesan tinan sira liu ona.
“Ha’u halo ona kontaktu ho parte seguransa sira atu garante distribuisaun ne’e tenke to’o iha fatin nune’e mos durante semana ida bele garante lori fali mai Nasiónal hodi halo koresaun,” dehan Ministra Dulce de Jesus.
Kuidadu Saúde
Ezame Nasionál ba estudante finalista terseiru siklu ensinu báziku no sekundáriu iha territóriu Timór laran tomak hela de’it loron tolu. Tan ne’e, Ministra Edúkasaun, Juventude e Desportu, iha biban lansa distribuisaun pontu ezame nasionál, husu ba estudante rihun 53.101 atu kuidadu saúde no mentál atu tuir ezame ho di´ak.
“Ezáme násional nu´udar pontu ida ikus liuhusi ba estudante finalista sira atu hakat ba faze seluk tuir nivel edukasaun ne’ebé sira iha”.
Nia konsidera, ezame nasionál ne’e mós nu´udar faze kompletamentu prosesu primeiru to’o terseiru siklu ensinu báziku nian no mós sira ne’ebé mak atu hakat ba universidáde. Ne’e duni, apoiu ba ezame nasionál ne’e la´ós responsabilidade Governu nian de’it maibé entidade hotu nian atu garante ezame ne’e bele la´o ho di´ak liután.
“Ha’u husu ba inan-aman, família no komunidade hotu atu fó rempu no espasu ba oan sira atu hakmatek hodi bele prepara sira-nia saúde no mentál atu garante ezame ne’e bele la´o ho di´ak tanba sira mak futuru ba rai ida ne’e nian presiza atu hetan apoiu másimu ba sira hodi nune’e nasaun bele hetan ninia jerasaun sira ne’ebé iha kualidade ida di´ak liu,” konklui Ministra Edukasaun Dulce de Jesus Soares.
Jornalista : Tomé Amado
Editór : Rafy Belo
