DILI, 11 outubru 2019 (TATOLI)-Timor-Leste hanesan nasaun ida ne’ebé iha kompromisu boot ba tane direitu ema hotu nian hanesan hodi “La Husik Ema Ida Iha Kotuk”, ohin, selebra mós loron internasionál ba labarik feto sira.
Serimónia ho karater nasionál no esperansa internasionál ne’e konsentra iha Sentru Konvensaun Dili (CCD-sigla portugés) atu oinsá enkoraja ema hotu tau atensaun ba labarik feto ba asesu edukasaun no hetan protesaun di’ak.
Atividade ne’e inisia husi Plan Internasionál kolabora ho Governu liu husi Komisaun Nasional Direitu ba Labarik ho Sekretaria Estadu Igualdade no Inkluzaun (SEII) ho tema Labarik Feto Foti Pozisaun “Labarik Feto ho igualdade” Bolu Asaun ba Prestasaun ne’ebé hanesan (hakerek fila fali iha nia istória).
Komemorasaun ne’e marka prezensa mós estudante husi Eskola Sekundária Nicolau Lobato, Estudante Eskola São Pedro, Estudante Eskola São Miguel no labarik sira husi Munisípiu Ainaro ho Aileu.
Membru Governu, hanesan Sekretáriu Estadu Komunikasaun Sosiál Mericio Juvenal Akara, membru Parlamentu Nasionál, Korpu Diplomátiku, reprezentante Ajénsia internasionais mós hola parte iha komemorasaun ne’e.
Jornalista : Nelson de Sousa
Editór : Francisco Simões
