DILI, 13 outubru 2019 (TATOLI)-Diretór Eskola Sekundária Jerál (ESG) An-nur, Luis Amaral do Rego hateten, preparasaun ESG An-nur hodi partisipa iha ezame nasionál iha tinan létivu 2019 ne´e másimu tanba ne´e hein de´it aban ezame.
“Eskola prepara komesa husi sala de aula, númeru ezame, buat hotu ne’ebé relasiona ho ezame nasionál prepara ona,” hateten Diretór Luis Amaral do Rego ba Ajénsia TATOLI iha nia kna’ar fatin Escola An-nur, sesta ne´e.
Tuir dadus ESG An-nur, totál estudante ne´ebé aban partisipa iha ezame nasionál hamutuk na´in 328. “Estudante ne’ebé la partisipa iha ezame nasionál na’in rua la hatene tanba ami tama iha segundu périodu ne’e labarik sira ne’e la ativu to’o ohin loron no ami mós berusaha (esforsu) buka tuir”.
Iha parte seluk diretór ne’e relata katak, besik ezame nasionál estudante feto ida foin rona iha segunda ne’e monu motor. “Estudante ida hela iha parte líquiça ne’ebá, Tibar iha segunda ne’e dehan monu ho motor, dehan agora labarik ne’e grave liu, ne’e mak ohin ha’u buka hela informasaun kona-ba labarik ne’e”.
“Estudante ne’e naran Maria nia hela iha Tibar, depois segunda mai eskola fila fali ho nia kolega monu ho motor iha Tibar ne’ebá. Agora daudauk nia grave iha ospitál Tibar ne’ebá mas ha’u rasik seidauk konfirma ba iha ne’ebá bele ka lae maibé tuir informasaun ne’ebé ha’u rona katak kanek la iha maibé labarik trauma hela to’o agora seida’uk ko’alia,” dehan diretór ESG-An-nur ne’e.
Hatan pergunta karik Estudante ne’e lá partisipa tuir ezame, Diretór ESG-An-nur, Luis Amaral do Rego hatan, la´ós estudante ne’e dehan katak nia la tuir: “Maibé, ami sei berusaha oinsá para nia mós bele tuir ezame tanba,nia iha direitu tomak atu ezame”.
Jornalista : Nelia Fernandes
Editór : Rafy Belo
