DILI,13 outubru 2019 ( TATOLI)-Dadus Organizasaun Mundiál Saúde (OMS) refere katak susubeen eskluzivu inan nian agora iha Timor-Leste (TL) iha 2013 ne´e 62% no iha 2016 ne´e 50%. Katak, tun 12%.
Reprezentante OMS iha Timor-Leste, Rajesh Pandav konsidera katak kauza ida ida ne´e tanba inan sira agora iha TL ne’e hili liu lata formula duke susubeen inan eskluzivu rasik tanba ne’e mak OMS halo promosaun ba susubeen eskluziku inan nian signifika susubeen inan ninian loos deit la iha hahán substitutu sira seluk tan tanba susubeen inan nian naturál ho maneira ne’ebé baratu atu fó han bebé no labarik.
“Ida ne’e mós asesivel ba ema hotu no la afeta ba orsamentu família kompara ho hahán artifisiál no susubeen inan ne’e kontribui no hamenus ki´ak,” dehan Reprezentante OMS iha Timor -Leste ba midia sira bainhira ramata workshop kona-ba susubeen eskluzivu inan nian iha salaun Konferensia Kofi Anan, Caicoli, sesta ne´e.
Iha biban hanesan, Médika Konsultante OMS iha TL, Magdalena Wholery ba mídia sira esplika OMS halo ona advokasia ba ministériu sira liuliu Ministeriu Saúde katak inan sira ne’ebé mak halo hela serbisu hanesan iha instuituisaun relevante sira hotu katak prepara fatin ruma ba bebé sira para to´o tempu inan sira fo susubeen eskluzivu inan nian iha servisu fatin ba bebé.
Susubeen inan atu mellora saúde dezenvolvimentu no sobrevivénsia ba bebé no labarik hodi bele kontribui mós atu mellora saúde bem estar inan nian iha tempu ne’ebé badak no naruk. “Susubeen inan nia iha nutrisaun hothotu,” subliña médika ne´e.
“Susubeen formula, la iha nutrisaun maibé iha susubeen inan eskluzivu nian iha susubeen nutrisaun ba bebé no susubeen ne´e nia nutrisaun ba bebé nee moras mós di´ak lalais maibé susubeen formula la iha nutrisaun halo bebe moras kle´ur lori tempu naruk,” nia esplika.
Médika Konsultante OMS, Magdalena Wholery akresenta, inan ne´ebé iha má nutrisaun no la iha nutrisaun iha susubeen hanesan de´it, tantu kuantidade no kualidade. “Maibé inan sra mak presiza han hahán ne’ebé iha nutrisaun hodi fó susubeen eskluzivu ba bebé”.
“Ita-nia mitus dehan katak han didi´ak mak susubeen inan nia iha maibé tuir realidade susubeen inan nian ne’e halo husi ita-nia raan no hahán ne’e suporta inan sira para forsa tan,” nia reforsa.
Alende, tuir médika Magdalena Wholery katak susubeen inan mak balansu ne’ebé mak forte no fo ba labarik sira hotu ho di´ak iha étapa hahú bebé moris no fó susubeen inan mak direitu eskluzivu husi feto hotu no tenke hetan apoiu husi sosiedade atu fó susubeen inan ho maneira ne’ebé ótimu.
Notísia relevante:Susubeen Inan Mak Bele Redús Mortalidade
Jornalista : Felicidade Ximenes
Editór : Rafy Belo
