DILI, 14 outubru 2019 (TATOLI)-Eskola Sekundária Jerál (ESG) 10 Dezembru, Comoro, hasoru difikuldade. Tuir Adjuntu Diretór, Mariano J. de Cruz, difikuldade mak eskola rua hamutuk iha fatin ida no mós biblioteka liuliu livru sira la sufiente tanba estudante sira barak liu.
“Iha eskola ne’e eskola rua mak hamutuk, depois afeita ne’e ba iha ida prinsipal liu mak, iha eskola ida ne’e komunidade mós hela iha laran, kos-kosan mós hela iha laran, iha ne’e komunidade ne’e hanesan movimentu, tanba moru iha kotuk mós badak, ema movimentu lao ba mai, hanesan sai fali dalan iha klaran, ida ne’e mak afeita oituan mai iha ne’e, mas ami-nia eskola la´o di’ak,” hateten Adjuntu Mariano J. de Cruz, ba Ajénsia TATOLI, iha fim-de-semana, ne´e.
“Difikuldade seluk hanesan liga ba biblioteka, ita-nia distribuisaun livru sira ne’e tinan uluk iha, agora tinan ne’e komesa alunu sira uza hela uitoan de’it menus, depois livru sira ne’e hanesan nia aumenta ne’e ladun iha, entaun nesesidade ne’e alunus ne’e barak liu,” reforsa tan adjuntu diretór ne´e.
Manorin na´in ne´e haktuir katak, foin daudauk ne’e muda tiha mekanizmu, tinan uluk bele fó empresta livru ba alunus. Tinan ida ne’e sira estuda de’it iha laran ona tanba ne’e difikuldade ne’e apoiu mak ladun masimu.
“Pior liu kaderneta tinan rua tutuir malu ne’e, ne’e difikulta tebes, difikulta profesór turma atu priense valór de ezame trimestral nian ba klase nian, loroloron mak tau de’it rekap de’it mak tau iha ne’ebá. Inan, aman balun hakarak nia oan hetan bolsa estudu ruma, dehan husu kaderneta, ami print out de’it provizória fó ba, mas kaderneta husu ba Ministériu dehan tenderization (konkursu), bainhira mak tender ne’e hotu, to’o ona tinan tolu”.
Adjuntu diretór ne’e aumenta, nesesidade kaderneta ida ne’e, besik ona rihun tolu hanesan ne’e ona tanba tinan rua tutuir malu. “Tanba ami-nia alunu volume boot, depois kaderneta ne’e la iha tebes, ida ne’e difikulta tebes ba profesór serbisu, ida ne’e problema sériu tuir loloos ne’e Ministériu tenke tau-matan ba ida ne’e”.
“Kaderneta ne’e kuandu profesór ne’e hala’o ona aula, nia rezultadu ne’e atu dehan katak profesór ne’e atu hanorin to’o ona iha ne’ebé, nia evaluasaun kurríkulu ne’e nia valór tau ba iha kaderneta para sai hanesan evidéncia agora ida ne’e la iha ne’e, ita enxe ba iha ne’ebé rekap de’it,” hateten adjuntu diretór.
Ho difikuldade sira ne´e, Adjuntu Diretór, Mariano J. de Cruz husu ba ministériu kompetente liuliu Ministériu Edukasaun, Juventude no Desportu (MEJD) atu haree no rezolve situasaun sira ne´e.
“Sebele karik bele tau polítika ruma, karik bele responde ba nessesidade ne’ebé eskola hotu infrenta ne’e. Tanba ne’e, atu hateten kualidade edukasaun nia rezultadu ne’e oinsá, ne’e eskola mós determina ba boa governasaun, ne’ebé sira iha leten ne’e sira labele ko’alia de’it iha leten maibé realidade ami iha okos ne’e, ami sente buat barak mak difikulta ami”.
Estudante 563 Partisipa Ezame Nasionál
Estudante ESG 10 Dezembru na´in 563 kompostu husi Departamentu Siénsia Sosiál no Umanidade ho Siénsia Teknolojia mak partisipa iha Ezame Nasionál.
Adjuntu Diretór, Mariano J. de Cruz ba haktuir: “Preparasaun hahú husi nesesidade ezame nian; ami tenke prepara sala ezame, kartaun ba estudante sira para tuir ezame, ami preparadu ona atu tuir ezame”.
Jornalista : Nelia Fernandes
Editór : Rafy Belo
