DILI, 14 outubru 2019 (TATOLI)-Estudante Eskola Sekundária Tékniku Vokasionál-Grupu Teknologia Indústria (ESTV-GTI) Becora, na´in siala partisipa iha Ezame Nasional sein justifikasaun.
Antes ne’e, parte eskola aprezenta ona totál númeru estudante finalista ESTV-GTI nian ne’ebé pósibel ona atu tuir ezame nasionál. Maibé realidade, segunda, 14 outubru 2019 estudante finalista na’in sia mak la marka prezensa.
Ministra Edukasaun, Juventude e Desportu (MEJD), Dulce de Jesus Soares hateten lista estudante finalista ESTV-GTI nian hamutuk na´in 333 maibé na’in sia mak auzente.
“Agora hela de’it sira hamutuk 323 de’it mak tuir ezame nasionál maibe sei iha posiblidade ba sira na’in sia ne’e iha faze tuir mai,” tenik Ministra Edukasaun Dulce de Jesus Soares ba jornalista sira iha ESTV GTI Becora, ohin.
Ministra promete katak maske estudante sira laiha informasaun maibé MEJD nafatin fasilita tempu daruak ba estudante sira ne’e atu bele tuir fali ezame nasionál.
Tanba ne’e mak MEJD husu ba komunidade família no inan-aman sira hotu iha territoriu Timór laran tomak atu nafatin fó apoiu no akompaña oan sira durante semana ida ne’e atu bele garante saúde no isin di´ak ba oan sira hodi bele partisipa iha ezame nasionál ne’e.
Notísia relevante:MEJD Hahú Distribui Pontus Ezame Nasionál
Jornalista : Tomé Amado
Editór : Rafy Belo
