SEPS Realiza Konferénsia Internasionál ba Sistema Protesaun Sivíl
DILI, 17 outubru 2019 (TATOLI)- Sekretária Estadu Protesaun Sivíl (SEPS) organiza semináriu internasionál durante loron rua, hahú ohin to’o aban (kinta-sesta 17-18/10/2019) ho tema “Enkuadramentu Legál ba Sistema Protesaun Sivíl iha Timor-Leste”.
Semináriu internasionál ne’e aprezenta oradór internasionál husi Indonézia, Austrália no Portugal ho objetivu bele partilla esperiénsia kona-ba enkuadramentu legál ba sistema protesaun sivíl husi oradór sira ba baze lei sistema protesaun sivíl ne’ebé la’o ona husi país sira refere.
Esperiénsia hirak ne’e bele ajuda kontribui elabora di’ak liu tan hodi harii sistema protesaun sivíl ida di’ak iha Timor-Leste.
Semináriu ne’e partisipa mós husi Ministru Defeza no Ministru Interior Interinu, Filomeno da Paixão de Jesus, Sekretáriu Estadu Protesaun Sivíl Alexandrino Xavier Araújo, UN Rezidente Koordenadór iha Timor-Leste Roy Trivedy, membru Parlamentu Nasionál, korpu diplomátiku, parseiru dezenvolvimentu, akadémiku, sosiedade sivíl, autoridade lokál no reprezentante partidu polítiku sira.
Jornalista : Nelson de Sousa
Editór : Francisco Simões
