Estudante 23 Partisipa Ezame Nasionál Segunda Faze
DILI, 22 outubru 2019 (TATOLI)- Dirasaun Edukasaun Munisípiu Dili fasilita ona estudante ensinu sekundáriu 23 hodi tuir fali ezame nasionál faze daruak hafoin lakon oportunidade iha faze dahuluk. Oportunidade ne’e dirasaun fó ba estudante ensinu sekundáriu finalista sira bazeia ba razaun fundamentál ne’ebé estudante sira hato’o.
Ministra Edukasaun,Juventude no Desportu (MEJD), Dulce de Jesus Soares hateten, iha Munisípiu Dili ezame nasionál faze daruak hala’o ona. Estudante 23 mak hetan oportunidade bazeia ba razaun ne’ebé sira hato’o.
“Hau simu ona informasaun Dili nian realiza ona ezame nasionál faze daruak maibé husi rejionál ka munisípiu sira seidauk iha informasaun,” informa Ministra Dulce de Jesus Soares ba jornalista sira iha salaun Ministériu Edukasaun Vila Verde, tersa (22/10/2019).
Ministra Dulce esplila katak oportunidade faze daruak ne’e bazeia ba fleksiblidade ka justifikasaaun formál katak estudante ne’e iha duni direitu atu tuir ezame nasionál, entaun Ministériu Edukasaun sei fasilita.
Maibe tenke hare katak legalmente sira prienxe kritériu tuir duni padraun ne’ebé konsagra ona. Purezemplu, haktuir membru VIII Governu ne’e katak estudante ka eskola ida atu hetan direitu tuir ezame nasionál tenke hetan lisensa ka rekoñesimentu husi MEJD.
Nia informa razaun estudante sira labele tuir ezame nasionál iha faze dahuluk ne’e Edukasaun Munisípiu sira mak halo analiza depois mak relata mai Nasionál katak estudante sira ne’e justifikadu iha problema tan ne’e sira labele tuir ezame iha faze dahuluk entaun Ministeriu sei fasilita ba faze daruak.
Notísia relevante:MEJD Hahú Konfirma Dadus Estudante Partisipa Ezame Nasionál
Jornalista : Tomé Amado
Editór : Rafy Belo
