SEPS Orienta Bombeiru Baucau ho Viqueque Kombate Inséndiu Quelicai
DILI, 23 outubru 2019 (TATOLI)-Sekretáriu Estadu Protesaun Sivíl (SEPS), Alexandrino Xavier de Araújo, orienta ona korpu bombeiru Munisípiu Viqueque atu reforsa tan bombeiru Baucau hodi kombate inséndiu ne’ebé akontese, ohin dadersán, iha foho Matebian hun, Postu Administrativu Quelicai, Munisípiu Baucau.
Notísia Relevante : Ahi Han Uma Lisan 13 iha Matebian Hun
Sekretáriu Estadu Alexandrino Xavier de Araújo, hateten, inséndiu ne’ebé akontese ikus-ikus ne’e sai preokupasaun boot ba Governu no povu ein-jerál. Tanba ne’e, nia husu atu ema hotu kolabora atu prevene inséndiu hodi la bele sunu rai arbiru.
Ba jornalista sira iha nia serbisu fatin, Caicoli, Dili, ohin, Alexandrino Xavier de Araújo, hateten, inséndiu ne’ebé akontese hodi rezulta vítima 1.000 iha territóriu tanba atitude hosi ema balun ne’ebé sunu rai arbiru.
“Ha’u husu ba koordenadór Munisípiu hotu to’o iha Xefe Aldeia atu toma atensaun ba nia komunidade sira atu evita sunu rai no mós investiga tuir ema ne’ebé mak kontinua estraga ambiente nune’e husu atu kontrola no fó sansaun ba sira,” afirma Governante ne’e.
Jornalista : Osória Marques
Editór : Francisco Simões
