DILI, 28 outubru 2019 (TATOLI) – Ministru Obra Públika, Salvador Eugénio Soares dos Reis Pires, iha esperansa bele ezekuta Orsamentu Jerál Estadu (OJE) 2019 ho másimu to’o ramata fulan-dezembru.
Totál orsamentu Ministériu Obra Publika (MOP) ba tinan 2019 hamutuk millaun $154,839, ne’ebé fahe ba kategoria saláriu no vensimentu millaun $5,121, bens no servisu millaun $128,457, transferénsia públika millaun $1, kapitál menór millaun $3,401, no kapitál dezenvolvimentu millaun $16,860.
Notísia Relevante: PN Aprova Orsamentu Ba MOP
“Totál orsamentu ne’ebé maka iha, atuál ezekusaun atinji ona millaun $90,8 korresponde ho porsentu 58,7, kompromisu millaun $36,6 korresponde ho porsentu 24,3, obrigasaun millaun $11,5 korresponde porsentu 7,4, balansu millaun $14,7 ho porsentu 9,5, ho totál ezekusaun porsentu 66,2”, informa Ministru Salvador iha audisaun konjunta komisaun iha plenáriu, segunda ne’e.
Nia hatutan: “Ami sei ezekuta porsentu 100 iha fulan-dezembru 2019”.
Governante ne’e esplika, ba kategoria saláriu no vensimentu ho totál millaun $5,1, konsege ezekuta ona millaun $3,874, enkuantu kategoria bens no servisu ezekuta ona hamutuk millaun $84,738.
Salvador dehan, Husi kompromisu hamutuk millaun $28, ezekuta ba estudu viabilidade no dezeñu hamutuk millaun $10, manutensaun ba bee moos millaun $7,7 no manutensaun ba estrada, ponte, kontrola seia, ne’ebé ninia prosesu konkursu hala’o ona, inklui manutensaun lojístika ministériu nian.
Nune’e mós parte obrigasaun iha millaun $6,9 korresponde ba porsentu 5,4, ne’ebé millaun $2-resin ba manutensaun jeradór, $900.000-resin ba kombustível jeradór, millaun $2,6 ba manutensaun estrada, ponte, kontrola seia ne’ebé hetan ona kompañia manán na’in no sira konsege halo mobilizasaun no halo ona obra, enkuantu balansu hamutuk millaun $8,04 reprezenta porsentu 6,3.
“Balansu hirak ne’e iha manutensaun jeradór, no liña transmisaun, maibé agora daudaun pagamentu sei la’o hela no fatura depende ba gastu kada fulan no mós verifikasaun hosi Ajénsia Dezenvolvimentu Nasionál (ADN). Dalaruma liña koordenasaun atraza hosi impaktu ezekusaun”, nia akresenta.
Iha kategoria transferénsia públika ho montante millaun $1 ezekuta ona pursentu 100, ne’ebé benefísia ba uma-kain hamutuk 1.237 hodi halo instalasaun solár panél no bio-gás ida iha territóriu nasionál.
Enkuantu kapitál menór ho totál orsamentu millaun $3,401, atuál ezekusaun $209.000-resin, ho kompromisu millaun $3, obrigasaun $20.000, nune’e balansu hela 10.000 resin.
Nune’e mós kapitál dezenvolvimentu ho totál orsamentu millaun $16,860, atuál ezekusaun atinji ona millaun $1,1, kompromisu millaun $6,4, obrigasaun millaun $3,9 resin, no balansu millaun $5,4 korresponde ho pursentu 31,17.
“Ezekusaun ba kapitál dezenvolvimentu ne’e iha balansu boot tanba iha projetu retensaun hamutuk 80-resin no mós projetu oioin ne’ebé mak kompañia sira seidauk reklama ba kustu retensaun, ne’ebé ami-nia ajente sira halo ona kontaktu ho sira atu organiza oinsá atu taka tiha ballansu sira ne’e”, hateten Ministru Salvador.
Jornalista: Evaristo Soares Martins
Editór: Xisto Freitas
